Mehriban Ələkbərzadə susqunluğunu pozdu

Azərbaycan Dövlət Akademik Milli Dram teatrının bədii rəhbəri Mehriban Ələkbərzadə Əməkdar artist Mehriban Xanlarovanın onunla bağlı iddialarına cavab verib.

Axşam.az xəbər verir ki, M.Ələkbərzadə yaydığı açıqlamada bunları yazıb:

"Əziz dostlar, həmkarlar! Əslində "sözünü o kəslərə de ki, onlar səni anlasınlar" deyə yola çıxıram. Demək ondan başlayaq ki, sosial şəbəkələrdə və saytlarda ünvanıma arzuolunmaz yazılar başlayıb. Məsələyə aydınlıq gətirmək məcburiyyətindəyəm, yoxsa onların bu həqiqətə uyğun olmayan sözlərinə inananlar da ola bilər.

Demək: mütəmadi olaraq teatrda sözü olan, istəyi, yaxud xüsusi xahişi olan aktyorlar rəhbərliyə müraciət edirlər. Arzusunu bildirir, bu normaldır. Belə bir vəziyyət Məsmə Aslanqızı ilə də oldu. Qəbuluma gələrək bildirdi ki, çox çətin vəziyyətdədir. Evi müsadirə ilə əlinden çıxıb (bu mövzu şəhid ailəsinə yaraşmayan əməlin nəticəsidir deyə açıqlamıram). Dedi ki, sizdən ev istəyirəm, teatr məni evlə təmin etməlidir. Anlatdım ki, mənim ev verə bilmək səlahiyyətim yoxdur. Dedi ki, o zaman 20 Yanvar şəhidinin qızı kimi mənə ev verdirin, siz məsələni həll etməlisiniz. Təkid etdi".

M.Ələkbərzadə bildirib ki, Əməkdar artist Məsmə Aslanqızı ona ev verilməsini istəyib. Bədii rəhbər bununla bağlı iddialara aydınləq gətirib:

"Bütün deyilənlərə bir daha münasibət bildirərək, yenə də bəyan etdim və edirəm: Hətta 20 Yanvar şəhidinin qızı olsa belə, mən teatrın bədii rəhbəri kimi ev məsələsini həll edə bilmirəm. Ev məsələsini başqa qurumlar həll edir. Biz də məhz şəhid qızı olduğu üçün onu Prezident mükafatı siyahısına salmışıq. Bir dəstək kimi. Amma bu ona yetərli deyil deyə belə həqiqətə uyğun olmayan və təhqirdən çəkinməyən ifadələr işlədir.

O ki qaldi, mənim vətəndaşlıq mövqeyimə... Az-çox yaradıcılığımla tanış olan, məni tanıyan hər kəs bilir ki, milli-mənəvi dəyərlərimiz naminə maarifçilik işlərinin, böyük zəfərimiz naminə "Qələbəyə qədər davamı var" silsilə hərbi vətənpərvərlik mövzusunda müəllif proqramlarının yaradıcısıyam. Yetərincə məhz vətənpərvərlik ruhuna xidmət edən fəaliyyətim var ki, onlar bizim ərazi bütövlüyümüz uğrunda savaşlardan, Vətən yolunda şəhid olan insanlardan bəhs edirdi.

Ən azı sözlərimin izahı üçün arxivlər var! Azərbaycan xalqının qəhrəmanlıq tarixi, mübarizəsinə həsr edilmiş, bu yolda canını və qanını fəda etmiş insanların xatirəsinə ithaf edilmiş 50-dən çox müəllif filmlərim, araşdırmalarım var. Heç kim mənim vətəndaşlıq mövqeyimə ləkə gətirə bilməz. Çünki buna əsas və fakt yoxdur".

Qeyd edək ki, M.Xanlarova M.Ələkbərzadənin teatra başqa teatrlardan aktyorlar dəvət etməsini tənqid edib. Onlar arasında qalmaqal bundan sonra başlayıb.

Telegramda izləyin