"Dəstərxan" restoranı səs-küyə görə cərimələndi

Bakıda fəaliyyət göstərən məşhur "Dəstərxan" restoranı musiqi səsləndirilməsi zamanı normadan artıq səs-küy yaratdığı üçün cərimələnib.

Qaynarinfo-nun məlumatına görə, daxil olan şikayət əsasında Ekologiya və Təbii Sərvətlər Nazirliyinin 11 saylı Regional Ekologiya və Təbii Sərvətlər İdarəsi tərəfindən restoranda yoxlama aparılıb. Yoxlama zamanı səs-küy səviyyəsinin normadan artıq olduğu müəyyən edilib.

Faktla bağlı restoran sahibi barəsində İnzibati Xətalar Məcəlləsinin 275.2-ci maddəsi ilə protokol tərtib olunub və iş məhkəməyə göndərilib. Qeyd olunan maddəyə əsasən, ətraf mühitə və insan sağlamlığına mənfi təsir göstərən vibrasiya və səs-küy çirklənməsi ilə bağlı normaların pozulmasına görə fiziki şəxslər 200-300 manat, vəzifəli şəxslər 2500-3500 manat, hüquqi şəxslər isə 8000-10000 manat məbləğində cərimə edilə bilər.

Məhkəmədə restoranın nümayəndəsi bildirib ki, həmin tarixdə müəssisədə normadan artıq səs-küy müşahidə olunmayıb. Onun sözlərinə görə, nazirlik əməkdaşları müəssisəni qəsdən cərimələyiblər. Bu səbəbdən inzibati xəta haqqında protokol üzrə icraatın xitam verilməsi xahiş olunub.

Məhkəmə isə nazirliyin təqdim etdiyi protokola əsaslanaraq "Dəstərxan" restoranının sahibi barəsində 8000 manat məbləğində inzibati cərimə tətbiq edib.

Telegramda izləyin