Niyə məşhurlar gündəm olmaq üçün ailə və məişət mövzularından istifadə edirlər? - AÇIQLAMA

Ötən günlərdə aparıcının efirdə atasız qızlarla bağlı səsləndirdiyi fikirlər tənqid olundu. Bu yaxınlarda isə müğənnilərdən biri deyib ki, "Kişi səhv etmək üçün, qadın da onu bağışlamaq üçün yaranıb". Sanki bunların hamısı sadəcə gündəmə gəlmək üçün atılan addımlardır. Bəs görəsən niyə məşhurlar gündəm olmaq üçün məhz məişət mövzularından istifadə edirlər?

Sosioloq Lalə Mehralı bu barədə Sonxeber.az -a açıqlama verib:

"Bu fikirləri sırf gündəmdə qalmaq üçün səsləndirənlər olsa da, öz real fikirlərini dilə gətirənlər də az deyil.

Məşhurlar, aparıcılar efirlərdə ona görə məişət mövzularına müraciət edirlər ki, insanların əksəriyyəti bu mövzulara maraq göstərir. İntellektual bir verilişlə şou-biznesin rəzilliklərini nümayiş etdirən veriliş arasında seçim edənlərin əksəriyyəti ikincini seçir. Mədəni, intellektual verilişləri izləyən tamaşaçıların sayı isə digərlərinə baxan tamaşaçıların sayından qat-qat azdır. Bu zövqü də elə televiziyalar formalaşdırıb. Onlar bu üsullarla gündəmdə qalmağı bacarırlar.

Ümumiyyətlə qadın və kişini müqayisə etmək, tərəziyə qoymaq, bərabərliyi təyin etmək və.s boş insanların işidir. Qadın və kişi bərabər olmamalıdır. Qadının funksiyasını kişi, kişinin funksiyasını da qadın yerinə yetirə bilməz. Buna görə də onların müqayisəsi hər zaman qalmaqal yaradır. Bu, heç vaxt həlli mümkün olmayan bir müqayisədir.

Hər hansı fikri sadəcə nəysə demək naminə səsləndirən insanların efirdə yeri olmamalıdır. Efir məsuliyyət deməkdir. O məsuliyyəti dərk etdikdən sonra efirə çıxmaq olar. Bu gün efirdə öz məsuliyyətini dərk edən aparıcıların sayı bir əlin beş barmağını keçmir. İntellekti, zəkası, düşünmə qabiliyyəti olan çox az sayda aparıcı var. Qalanları isə hansı yolla aparıcı olduğu, məqsədi bilinməyən insanlardır. O insanların hər hansı sözünü ciddiyə alıb qalmaqal etməyin özü də mənasızdır. Həmin şəxslər bu qalmaqallar sayəsində axtardıqları məşhurluğa çatırlar. Odur ki, bəzi hallarda etinasız yanaşmaq lazımdır".

Çiçək Sadatova

Telegramda izləyin