Çoxuşaqlı analar daha tez pensiyaya çıxa bilərmi? - AÇIQLAMA

Qadınların pensiyaya çıxması qaydasının uşaqların sayına görə müəyyənləşdirilməsi təklif olunur.

Bunu Milli Məclisin Əmək və sosial siyasət komitəsinin üzvü Vüqar Bayramov komitənin bugünkü iclasında "Əmək pensiyaları haqqında" qanuna təklif edilən dəyişikliklərin müzakirəsi zamanı deyib.

Onun sözlərinə görə, qanunda güzəştli şərtlərlə pensiyaya çıxmaq hüququ yalnız kəmiyyət deyil, keyfiyyət psinsipi ilə müəyyən edilməlidir:

"Çoxuşaqlı ailələrdə valideynlərin pensiyaya tez çıxmaq müddəti uşaqların sayına uyğun müəyyənləşdirilməlidir. 5 və daha artıq uşağı olan şəxslər daha tez pensiyaya çıxa bilirlər. Lakin bəzi ailələrdə 5-dən çox uşağı olanlar var. Təklif edirəm ki, pensiyaya tez çıxmaq üçün nəzərdə tutulan güzəştlər ailədəki uşaq sayına görə müəyyənləşsin".

Bəs görəsən bu təklif təklif reallaşa bilərmi?

Mövzu ilə bağlı sosioloq Lalə Mehralı Sonxeber.az -a açıqlama verib:

"Əvvələr üçdən çox övladı olan valideyinlər 57 yaşdan etibarən sosial müavinət alırdılar. Pensiya yaşına çatdıqda isə özləri seçirdilər - pensiya alsınlar yoxsa müavinət. Həmin sistem təxminən 6-7 il əvvəl ləğv edildi. Hazırda çoxuşaqlı analar daha tez pensiyaya çıxa bilir. Lakin, çoxuşaq dedikdə övladlarının sayı altıdan çox olan valideyinlər nəzərdə tutulur. Bizim ölkədə altıdan çox uşağı olan ailə sayı azdır. Düşünürəm ki, çoxuşaqlılıq meyyarı azaldılmalıdır və daha sonra yeni meyyara əsasən çoxuşaqlı anaları daha tez pensiyaya çıxarmaq təklifi real ola bilər. Altı yox, üç-dörd uşaqlı anaları çoxuşaqlı ana hesab etmək olar. Daha sonra isə bu meyyara əsasən pensiya yaşını azaltmaq olar. Təbii ki, bu addım ailələrə böyük dəstək olar, lakin bu halda da uşağı olmayan anaların haqqını tapdamaq olmaz. Övladı olmayan, sağlamlıq imkanları məhdud olan qadınları da düşünmək lazımdır. Bütün bunları nəzərə alıb qadınların pensiya yaşını nəzərə alıb yaş meyyarını da azaltmaq olar".

Telegramda izləyin