"Unibank"a aid şirkətin biznes itkiləri 217 milyon manata çatıb

"Unibank"a aid şirkətin biznes itkiləri 217 milyon manata çatıb.

Valyuta.az xəbər verir ki, söhbət "Unicapital İnvestisiya Şirkəti"ndən gedir.

Belə ki, investisiya şirkətinin bu ilin yanvar-mart aylarında Bakı Fond Birjasında apardığı əməliyyatların həcmi 1723 əqd üzrə 591 milyon manat təşkil edib. Bu isə ötən ilin eyni dövrü ilə müqayisədə 26,8% və ya 216,7 milyon manat azdır. Halbuki, şirkətin 2024-cü ilin ilk rübündə daxili birja dövriyyəsi 1071 əqd üzrə 807 milyon 782 min manata bərabər olmuşdu.

"Unicapital"ı dövriyyəsinin bir əqd üzrə orta dəyəri 343 min manat təşkil edib ki, bu ötən ilin eyni dövrü ilə müqayisə edildikdə 54,5% azalma deməkdir.

İnvestisiya şirkətinin portfelinin əsas hissəsini əsasən repo əməliyyatları və korporativ istiqrazlar təşkil edib. Belə ki, bu dövrdə şirkətin dövriyyəsinin 224 milyon 535 min manatı korporativ istiqrazların, 309 milyon 143 min manatı repo əməliyyatlarının payına düşüb.

Portfeldə dövlət istiqrazlarının payı 48 milyon 831 min manat, AMB-nin notları 7 milyon 597 manat, səhmlər isə 927,3 min manat təşkil edib.

Xatırladaq ki, "Unicapital İnvestisiya Şirkəti" 2007-ci ildə yaradılıb və "Unibank"ın törəmə şirkətidir. Şirkətin qanuni təmsilçisi isə Vüqar Namazovdur.

Telegramda izləyin