"Yuxu – bədənin və zehnin bərpa dövrüdür" – psixoloq yuxusuzluğun fəsadlarından danışdı - AÇIQLAMA

"Yuxu, ümumilikdə insan sağlamlığı üçün həyati əhəmiyyət daşıyan proseslərdən biridir. Bu, yalnız fiziki deyil, eyni zamanda zehni və emosional sağlamlığın qorunmasında mühüm rol oynayır. Bəzən insanlar yuxuya bir seçim kimi yanaşır – "olsa da olar, olmasa da", yaxud "yatacağım vaxtda da işləsəm daha səmərəli olar" kimi fikirlər formalaşır. Lakin bu, səhv yanaşmadır".

Bu sözləri Sonxeber.az-a Amerika psixoloqlar assosasiyasının üzvü, Psixoloq Konsultant Şirin Məmmədli danışıb.

Psixoloq açıqlamasında qeyd edib ki, yuxu – bədənin və beynin bərpası, tarazlanması və informasiyaların inteqrasiyası üçün vacib bir dövrdür:

"Yuxu psixoloji, fiziki və emosional baxımdan insanı yenidən qurur. Son illər isə yuxusuzluq şikayətləri artmaqdadır. Psixoloqların sözlərinə görə, bunun səbəbləri çoxşaxəlidir. Ən önəmlilərindən biri isə anksiyete – yəni həyəcan pozuntusudur. Bu hal bədəndə gərginlik, ürəkdöyünmənin artması, tez-tez oyanma kimi simptomlarla müşahidə olunur. İnsanlar beyinlərini məşğul edən çoxsaylı suallara görə yuxuya getməkdə çətinlik çəkirlər.

Əgər yuxusuzluq 3 həftədən çox davam edirsə, bu artıq ciddi hesab olunur və xroniki hala keçə bilər. Təəssüf ki, psixoloqlara müraciət edən şəxslərin çoxu bildirir ki, illərdir düzgün yata bilmirlər – bu da müalicə prosesini çətinləşdirir və problemin daha da dərinləşməsinə səbəb olur. Belə hallarda insan eyni zamanda həm psixoloqa, həm psixiatr, bəzən isə endokrinoloqa müraciət etməli olur.

Bu hal depressiyanın və ya anksiyetenin ilkin simptomu ola bilər. Ona görə də problemin erkən mərhələdə aşkarlanması və düzgün yönləndirilməsi həyat keyfiyyətini ciddi şəkildə yaxşılaşdıra bilər.

Yuxusuzluğun fiziki fəsadları da az deyil. Aclıq hormonlarının artması nəticəsində insan kökəlməyə meyilli olur. Bəzi xroniki hallarda isə "donma" kimi vəziyyətlər müşahidə olunur – yəni insan ətrafda baş verən hadisələrə reaksiya verməkdə çətinlik çəkir, sanki öz həyatını kənardan izləyirmiş kimi hiss edir.

Bu kimi ağır nəticələrin qarşısını almağın yeganə yolu vaxtında peşəkar yardıma müraciət etməkdir".

Vüsalə İbrahimli

Telegramda izləyin