İdman zalına getmədən sağlamlığı yaxşılaşdıran 3 gündəlik vərdiş

Sağlamlığı qorumaq və özünü daha yaxşı hiss etmək üçün mürəkkəb üsullara ehtiyac yoxdur. Alimlər gündəlik həyata asanlıqla daxil edilə bilən üç sadə vərdişin ümumi sağlamlığa və psixoloji vəziyyətə müsbət təsir göstərdiyini bildiriblər.

Qaynarinfo xəbər verir ki, "Science Focus" nəşrinin yazdığına görə, təbiətdə vaxt keçirmək, yuxu rejiminə riayət etmək və bağırsaq sağlamlığının qayğısına qalmaq bu vərdişlər sırasındadır.

Birinci vərdiş - təbiətdə gəzmək. Araşdırmalar göstərir ki, yaşıllıq ərazilərdə vaxt keçirmək stressin azalmasına və əhvalın yaxşılaşmasına kömək edə bilər. Bunun üçün parkda müntəzəm gəzmək və ya bağda vaxt keçirmək kifayətdir.

İkinci vərdiş - yuxu rejimini qorumaq. Yuxu zamanı orqanizm bərpa olunur, beyin isə məlumatları emal edir və yaddaşı möhkəmləndirir. Keyfiyyətli yuxu emosional vəziyyətə və diqqəti cəmləmək qabiliyyətinə də təsir göstərir. Buna görə də hər gün təxminən eyni saatda yatmaq və oyanmaq tövsiyə olunur.

Üçüncü vərdiş - bağırsaq sağlamlığına diqqət yetirmək. Alimlər bağırsaq mikrobiomu ilə qidalanma və orqanizmin ümumi vəziyyəti arasındakı əlaqəni araşdırırlar. Bu baxımdan sağlam qidalanma, həmçinin nanə və zəncəfil kimi bitki mənşəli məhsulların mümkün faydaları diqqət çəkir.

Tədqiqatçılar vurğulayırlar ki, sağlam həyat tərzinə dair sadə və anlaşılan tövsiyələri gündəlik həyata tətbiq etmək daha asandır. Bununla belə, bu vərdişlər sağlam həyat tərzinin bir hissəsi kimi qiymətləndirilməli, zəruri hallarda tibbi məsləhəti və digər sağlamlıq tədbirlərini əvəz etməməlidir.

Telegramda izləyin