Kişilər və qadınlarda ürəyin fərqli döyünməsinin səbəbi tapıldı

Ürəyin təbii kardiostimulyatoru olan sinoatrial düyün kişi və qadınlarda fərqli fəaliyyət göstərir.

Oxu.Az bu barədə naukatv.ru-ya istinadən xəbər verir.

Qeyd olunur ki, yeni araşdırmalara əsasən, bu fərq ürək ritmini və aritmiya həssaslığını müəyyən edən genetik amillərlə bağlıdır.

Ohayo Dövlət Universitetindən Vadim Fyodorov deyib: "Biz ilk dəfə olaraq sinoatrial düyünün funksiyasını idarə edən genlərin cinsiyyətə xas olduğunu kəşf etdik".

Tədqiqatçılar donorların ürəklərini tədqiq edərək sinoatrial düyünün kardiostimulyator hüceyrələrində unikal genetik quruluşları müəyyən ediblər. Genetik təhlillər nəticəsində cinslər arasında fərqliliklər aşkar edilib.

Araşdırma nəticəsində qadınlarda daha sürətli ürək döyüntüsünü təşviq edən TBX3 və HCN1 genlərinin yüksək səviyyədə ifadə olunduğu məlum olub.

Kişilərdə isə elektrik keçiriciliyini poza bilən iltihab və kollagen istehsalı ilə əlaqəli genetik şəbəkələrin daha aktiv olduğu müəyyən edilib.

Bildirilir ki, bu kəşf ürək ritm pozğunluqlarının müalicəsində fərdiləşdirilmiş terapiya üçün yeni imkanlar yarada bilər.

Telegramda izləyin