Yıxım qərarına baxmayaraq evini sökdürməyən adam, onun üstünə 10 mərtəbəli nəhəng piramida tikdi

Çinin cənub-qərbində yaşayan 42 yaşlı Chen Tianming yerli hakimiyyət orqanlarının qərarlarına qarşı çıxaraq evinin üzərinə tam 10 mərtəbəli, piramida formasında nəhəng bir tikili inşa edib.

Sonxeber.az türk mediasına istinadən xəbər verir ki, Guizhou əyalətində yerləşən kəndi 2018-ci ildə lüks bir kurort layihəsi üçün tamamilə sökülüb. Bölgədə teatr salonları və süni göllərin daxil olduğu genişmiqyaslı bir turizm kompleksi planlaşdırılıb. Lakin Chenin ailəsi babasının 1980-ci illərdə tikdiyi evi tərk etmək istəməyib.

Rəsmilər evi sökməyə çalışsa da Chen buna icazə verməyib. O, illər ərzində tikintini davam etdirərək nəhayət 10 mərtəbəli, piramida formalı, eyvanlar, taxta sütunlar, pilləkənlər və əlavə hissələrlə zəngin bir qülləyə çevrilən qeyri-adi bir tikili ortaya çıxarıb.

Chenin evi rəsmi olaraq qanunsuz elan edilib və ilkin təkmərtəbəli ev istisna olmaqla qalan bütün tikililərin sökülməsi barədə qərar verilib. Lakin Chen qərarlıdır:
"Heç kim bu evi yıxa bilməz. Biz illərdir burada yaşayırıq. Artıq kurort layihəsi də olmayacaq, bəs evimi niyə söksünlər?"

Gecələr fənərlərlə işıqlandırılan bu maraqlı tikili turistlərin də diqqətini çəkməyə başlayıb. Yerli sakinlər binanın gözəl göründüyünü və əgər təhlükəsizlik baxımından problem yoxdursa, rəsmi bir simvola çevrilə biləcəyini düşünür.

Bəzi Çin media orqanları bu qeyri-adi evi məşhur yapon animatoru Hayao Miyazakinin filmlərindəki fantastik tikililərə bənzədir. ABŞ-ın Florida ştatında da bir adam, qonşularının mənzərəsini bağlamaq üçün qəribə bir qüllə tikmişdi və "əgər narahat olublarsa, nə xoş" deyərək diqqət çəkməyə çalışmışdı.

Amma Chenin hekayəsi tamamilə fərqlidir: bütün kənd sökülüb, qonşular köçüb, amma o hələ də evində dirəniş göstərir.

Telegramda izləyin