"Ölüm anında əlimi sinəsindən çəkib dedi ki..." - Fərman Şəkilinin ailəsi onunla bağlı xatirələrini danışdı

Baku TV-nin "Retro Baku" verilişinin yeni buraxılışı aktyor Fərman Abdullayevə (Fərman Şəkili) həsr olunub.

Verilişdə aktyorun ailəsi və dostları onunla bağlı xatirələrini bölüşüblər.

"Heç təsəvvür etmirdim ki, nə vaxtsa, Fərmanla tanış olarıq. Məndən yaşca xeyli böyük idi. Buna görə də onun evli olduğunu düşünürdüm. Fərmanla ilk tanışlığımız Şəki Dövlət Dram Teatrında baş tutub. Teatrda Fərmanın diqqətini hiss edəndə "evli ola-ola başqa qızlara baxır" düşüncəsi ilə onu qınadım. Sonralar qəlbimi oğurlamağı bacardı. Fərmanı tanıdıqca, ona daha da vurulurdum. Çox cəfakeş biri idi", - mərhum aktyorun həyat yoldaşı İradə Abdullayeva söyləyib.

11 ay xərçəng xəstəliyindən əziyyət çəkən F.Abdullayevin oğlu Edqar Abdulla atasının səhhəti ilə bağlı yaşadığı çətinliklərdən danışıb:

"Atam uzun müddət bu xəstəlikdən əziyyət çəkirmiş. Amma əlavə xərcimiz çıxar deyə bunu bizə deməmişdi. Xəstəxanaya gedəndən sonra artıq gec olduğunu öyrəndik. Həkimlər atama 4-5 ay vaxt qoydular. O isə 11 ay yaşadı. Bu bizim üçün böyük nemət idi. Atam çox mərd insan olub. Öləcəyini bilə-bilə bizə təsəlli verirdi. Əbədiyyətə qovuşacağı üçün sevinirdi".

Daha ətraflı Baku TV-nin videomaterialında:

Telegramda izləyin