Aktyorların belə pul ala bilmədiyi kino necə tarixin ən yaxşı 5-ci filmi oldu?

IMDb-nin ən yaxşı 250 film siyahısında yer alan, 1957-ci ildə nümayiş olunan və illərlə dərs materialı kimi istifadə edilən bir film var. Bəs çəkildiyi dövrdə heç bir kassa uğuru qazanmayaraq, bəzi aktyorların hətta pulunu belə ala bilmədiyi filmin hekayəsi nədir?

Qaynarinfo xəbər verir ki, söhbət Sidney Lumetin çəkdiyi 1957-ci il istehsalı olan "12 Angry Men" – Azərbaycan dilində "12 Qəzəbli Kişi" filmindən gedir. Bütün zamanların ən nüfuzlu filmlərindən sayılan bu şah əsəri demək olar ki, tamamilə bir otaqda keçən sadə quruluşuna baxmayaraq, onilliklərdir təsirini itirməyən bir kult əsərə çevrilib.

Filmin mövzusu nədir?

Filmin hekayəsi, qətldə günahlandırılan bir gəncin taleyini müəyyənləşdirmək üçün bir araya gələn 12 münsif üzvünün müzakirələrinə əsaslanır. İlk baxışda cinayətin baş verdiyi tamamilə aydın görünür; sanki qərar çoxdan verilib. Lakin münsiflərdən biri "Bir insanın həyatı müzakirə mövzusudursa, tələsməməliyik" deyərək şübhələrini ifadə edir. Bundan sonra otaqda başlayan gərginlik tədricən hər bir münsifin qorxularını, qəzəbini və vicdanını üzə çıxaran dramatik bir qarşıdurmaya çevrilir.

Büdcəsi nə qədər idi?

"12 Qəzəbli Kişi" Sidney Lumetin rejissor kimi çəkdiyi ilk film idi. 96 dəqiqəlik film cəmi 340.000 dollar büdcə ilə ərsəyə gəlib.

Kassada uğursuzluq

"12 Qəzəbli Kişi", dövrün Hollivud əyləncə üslubuna uyğun olmayan, aksiyondan çox dialoqlara söykənən bir film olduğu üçün nümayiş olunduğu ildə gözlənilən diqqəti görməyib. Tək məkan, ulduz aktyor azlığı və dramatik quruluş səbəbilə geniş kütlə filmi seçməyib.

"Screen Rant"ın məlumatına görə, həmin dövrdə böyük ulduz olan və filmdə 8 nömrəli münsifi canlandıran Henri Fonda, studiyanın bölgü strategiyasından məyus olub. O düşünürmüş ki, rəhbərlik filmi tamaşaçıya çatdırmaq və gəlir əldə etmək üçün lazım olan şansı verməyib. Buna baxmayaraq, Fonda bu filmi karyerasının ən yaxşı işlərindən biri adlandırıb və onu "möhtəşəm" kimi səciyyələndirib.

Film gəlir gətirmədiyi üçün Henri Fonda heç öz maaşını ala bilməyib.

Necə əfsanəyə çevirildi?

Bəs necə oldu ki, film klassikləşdi? Zaman keçdikcə film kino məktəblərinin, hüquq fakültələrinin və ədalət mövzulu dərslərin ayrılmaz materialına çevrilib. Tənqidçilər filmi yenidən dəyərləndirərək deyir:

* möhtəşəm aktyor oyunu,
* gərginlik yaratmaqdakı sadəlik və ustalıq,
* tək məkan olmasına baxmayaraq heç sıxmayan dinamika,
* insan təbiətinə dair iti müşahidələr

Film yavaş-yavaş bütün dünyada kult izləyici kütləsi qazanıb və nəticədə IMDb TOP-250 siyahısında 5-ci yerə qədər yüksəlib.

Filmin "Rotten Tomatoes"da tənqidçi balı tam 100-dür. IMDb balı isə 9.

"Screen Rant"a görə, filmin məşq prosesi aktyorlar üçün olduqca çətin keçib. Rejissor Sidney Lumet aktyorları saatlarla eyni otaqda qalmağa və replikalarını dəfələrlə təkrarlamağa məcbur edib — özü də heç bir çəkiliş aparmadan. Bu üsul aktyorlara həddindən artıq isti bir otaqda, dünyadan təcrid olunmuş vəziyyətdə qalan bir qrup kişinin nə hiss etdiyini real şəkildə yaşatmaq üçün seçilib.

Telegramda izləyin