"Yeniyetmələr çevrələri tərəfindən qəbul olunmaq üçün həmişə güclü ehtiyac duyur" - AÇIQLAMA

Müasir dövrdə uşaqların internet klublara artan marağı yalnız texnoloji dəyişikliklərlə deyil, həm də sosial mühitdə baş verən proseslərlə sıx bağlıdır. Uşaqların internet klublara həddindən artıq maraq göstərməsinin və asılılıq səviyyəsinə çatmasının əsas sosial-psixoloji səbəbləri hansılardır?

Mövzu ilə bağlı Sonxeber.az- psixoloq Samirə Bağırova danışıb.

O, açıqlamasında qeyd edib ki, internet klublarındakı oyunlarda uduş, yeni mərhələyə keçid, əldə edilən süni mükafat və ətrafın reaksiyası beynə süni xoşbəxtlik siqnalları göndərir:

"Təbii ki, bu vəziyyətin arxasında bir çox sosial-psixoloji faktor dayanır. Ən birinci əsas, kök səbəb real həyatda emosional doyumluluq tapa bilməmədir. Valideynlərin öz işləri ilə çox məşğul olması, ailə içi konfliktlər, uşağa qarşı soyuqluq, sevgisizlik, diqqətsizlik, dərin qayğı göstərilməməsi — sadəcə valideynlik vəzifəsinin emosional deyil, fiziki olaraq yerinə yetirilməsi. Təhsildə müəllim və şagird münasibətlərində soyuqluq, motivasiya hissinin yaradılmaması bu boşluğu internet klublardakı oyunların daha asan və sürətli şəkildə doldurmasına səbəb olur.

İkinci əsas səbəb uşağın sosial çevrənin təsirinə düşməsidir. Yeniyetmələr çevrələri tərəfindən qəbul olunmaq üçün həmişə güclü ehtiyac duyur. Kənarlaşmaq, "hamı gedir, mən də getməliyəm" düşüncəsi asılılıq yaradan psixoloji vəziyyətin mürəkkəbləşməsinə yol açır. İnsan üçün ən vacib olan adrenalin və dopamin hormonlarının ifrazı qısa müddətli zövq axtarışına alışdırır. Bu da daxili təşviş, həyəcan, gərginlik, aqressivlik və daxili boşluq yaranmasına səbəb olur.

İnternet klublarındakı oyunlarda uduş, yeni mərhələyə keçid, əldə edilən süni mükafat və ətrafın reaksiyası beynə süni xoşbəxtlik siqnalları göndərir. Real həyatda bu qədər tez-tez mükafat almaq mümkün deyil. Oyun uşağa uğur hissini dərhal təqdim edir. Bu isə yenidən asılılıq sindromuna və vərdişə səbəb olur.

Qısa nəticə olaraq, uşaqların internet klublara yönəlməsi — psixoloji ehtiyaclarının sevdikləri tərəfindən ödənilməməsi nəticəsində yaranan psixoloji boşluğun nəticəsidir".

Telegramda izləyin