Quduzluqdan həyatını itirən gənclə bağlı paylaşıma yazılan rəy etiraz doğurdu - VİDEO

Diyarbakırın Ergani rayonunda sahibsiz itlərin hücumuna məruz qalan Suriya əsilli Hasan Ahmedə quduz diaqnozu qoyulub.

Sonxeber.az türk mediasına istinadən xəbər verir ki, yolda gedən Suriya əsilli Hasan Ahmed və qardaşı sahibsiz itlərin hücumuna məruz qalıb. Bədənlərinin müxtəlif nahiyələrindən yaralanan qardaşlar ətrafdakıların məlumat verməsi ilə Şanlıurfa Siverek Dövlət Xəstəxanasına aparılıb.

İlkin tibbi müdaxilədən sonra hər iki uşaq Siverek Dövlət Xəstəxanasında müalicə altına alınıb. Bir müddət sonra vəziyyəti pisləşən Hasan Ahmed Şanlıurfa Harran Universiteti Tibb Fakültəsi Xəstəxanasına göndərilib. Burada aparılan müayinələr nəticəsində hər iki qardaşa quduz diaqnozu qoyulub və karantində müalicələri davam etdirilib. Həkimlərin bütün səylərinə baxmayaraq Hasan Ahmed 12 oktyabrda həyatını itirib. Qardaşının müalicəsinin isə davam etdiyi bildirilib. Ailənin acısı bölgədə sahibsiz it problemi və görülən tədbirləri yenidən gündəmə gətirib.

Quduz diaqnozu qoyulduqdan sonra karantinə alınan Hasan Ahmedin xəstəxanadakı son anlarına aid görüntülər də üzə çıxıb. Mobil telefonla çəkilən görüntülərdə tibb bacısının ona su vermək istədiyi anda uşağın qorxuya düşdüyü, ağlamağa çalışdığı və dizlərinə vurduğu görülür.

Bu görüntülərin yayılmasının ardından X platformunda "Helin" adından istifadə edən bir şəxsin paylaşımı böyük qınaq doğurub. Həmin şəxs, Hasan Ahmedin həyatını itirdiyi hadisəyə işarə edərək, "Köpəyə bir şey olmayıb, rahat olun" ifadəsini yazıb. Paylaşımın ardından çox sayda sosial şəbəkə istifadəçisi "Sən insan deyilsən" kimi sərt reaksiyalar bildirib.

Telegramda izləyin