Göbələyin kişiləri xərçəngdən necə qoruya biləcəyi AÇIQLANDI

Həkimlər kişilərə həftədə ən azı bir neçə dəfə göbələyi qida rasionuna daxil etməyi tövsiyə edirlər. Araşdırmalar göstərir ki, bu vərdiş xərçəng riskinin azalmasına kömək edə bilər.

Lent.az xarici mediaya istinadən xəbər verir ki, göbələklər kişilərdə xərçəng hüceyrələrinin yaranmasına qarşı qoruyucu təsir göstərə bilər.

Göbələklərin dadı hər kəsin xoşuna gəlməsə də, bu məhsul ümumi sağlamlığa əhəmiyyətli təsir göstərən dəyərli xüsusiyyətlərə malikdir. Alimlər kişilərdə prostat vəzi xərçəngi ilə göbələk istehlakı arasındakı əlaqəni araşdırmaq məqsədilə genişmiqyaslı tədqiqat aparıblar.

Araşdırmaya yaşı 37-dən yuxarı olan 36 499 nəfər cəlb edilib. Tədqiqat zamanı iştirakçıların qidalanma rejimi, zərərli vərdişləri, fiziki aktivliyi və sağlamlıq vəziyyəti nəzərə alınıb. Araşdırma müddətində iştirakçıların 3,3 faizi prostat xərçənginə tutulub.

Məlum olub ki, həftədə 1 və ya 2 dəfə göbələk yeyən kişilərdə prostat xərçənginə tutulma riski, göbələyi daha az istehlak edənlərlə müqayisədə 8 faiz aşağı olub. Həftədə üç dəfə göbələk yeyən şəxslərdə isə bu risk 17 faiz azalıb.

Mütəxəssislər bu müsbət təsirin göbələklərin tərkibində olan L-erqotionein adlı antioksidantla əlaqəli ola biləcəyini ehtimal edirlər. Bununla belə, doktor Şu Tsyan vurğulayıb ki, sağlamlıq üçün yalnız müəyyən məhsulları rasiona intuitiv şəkildə əlavə etmək yox, ümumilikdə qidalanma vərdişlərinə diqqət yetirmək daha vacibdir.

Telegramda izləyin