Yaz yorğunluğundan necə qurtulaq?

Yaz aylarında hava dəyişiklikləri bir çox insanda yorğunluq, zəiflik, stress, yuxusuzluq və oynaq ağrıları kimi şikayətlərə səbəb ola bilər.

"Qafqazinfo" xəbər verir ki, bu simptomların qarşısını almağın əsas yolu düzgün və balanslı qidalanmadır.

Yaz dövründə çay və qəhvə istehlakı artsa da, bu içkilər suyun yerini tutmur. Mütəxəssislər orqanizmin təmizlənməsi və düzgün fəaliyyəti üçün suyun vacibliyini vurğulayır. Hesablamalara görə, insan gündə hər kiloqram bədən çəkisinə 30 ml su qəbul etməlidir. Məsələn, 70 kq çəkisi olan şəxs gün ərzində ən azı 2,1 litr su içməlidir.

Mütəxəssislər səhər yeməyinin günün ən vacib qidası olduğunu bildirirlər. Günə enerji ilə başlamaq üçün səhər yeməyi mütləq qəbul edilməlidir. Sürətli və keyfiyyətsiz qidalar (məsələn, xəmir məmulatları) əvəzinə balanslı seçimlərə üstünlük verilməlidir.

3 əsas yemək (səhər, nahar, şam) və 3 sağlam qəlyanaltıdan ibarət qidalanma planı qan şəkərinin balansda saxlanmasına kömək edir. Qəlyanaltı kimi badam, qoz və fındıq kimi faydalı yağlar tövsiyə olunur.

Gündəlik rasiona kefir və qatıq kimi probiotik məhsulların əlavə edilməsi bağırsaq sağlamlığı üçün vacib hesab olunur. Gündə ən azı 2 stəkan kefir və ya qatıq istehlak edilməsi məsləhət görülür.

Vitamin və mineral baxımından zəngin qidalar, xüsusilə tərəvəz və meyvələr gündəlik qidalanmada mühüm yer tutmalıdır. Həftədə ən azı bir dəfə balıq istehlak edilməsi tövsiyə olunur.

Bundan başqa, şəkərli qidalardan uzaq durmaq, ağ un məhsulları əvəzinə tam taxıllı məhsulları seçmək, ət məhsullarını isə qızartma əvəzinə qaynadılmış, bişmiş və ya qril formada qəbul etmək daha faydalıdır.

Mütəxəssislər artıq çəkidən qurtulmaq və sağlam həyat tərzini qorumaq üçün hər gün ən azı 30 dəqiqə sürətli gəzinti etməyi tövsiyə edirlər. Eyni zamanda, balanslı qidalanma ilə ideal çəkiyə çatmaq vacib sayılır.

Düzgün qidalanma və aktiv həyat tərzi yaz mövsümünü daha enerjili və sağlam keçirməyə kömək edir.

Telegramda izləyin