Evi yanan qonşusuna köməyə gedən qadın canından olub - VİDEO

Tokatın Niksar rayonunda baş verən yanğın faciə ilə nəticələnib.

Sonxeber.az türk mediasına istinadən xəbər verir ki, hadisə aprelin 12-də rayonun Melikqazi məhəlləsində qeydə alınıb.

Məlumata görə, Hamdi Çavuş küçəsində yerləşən, S.G.-yə məxsus iki mərtəbəli evdə, evdə heç kimin olmadığı vaxt hələlik naməlum səbəbdən yanğın baş verib.

Evdən yüksələn tüstünü görən qonşu Zübeydə Şimşək vəziyyəti yoxlamaq və ev sahibinə kömək etmək məqsədilə evin arxa qapısını sındıraraq içəri daxil olub. Evdə kiminsə ola biləcəyini ehtimal edən qadın tüstü ilə dolu məkanda huşunu itirib.

Hadisə yerinə cəlb olunan yanğınsöndürənlər evdə apardıqları axtarış zamanı Zübeydə Şimşəyi huşsuz vəziyyətdə aşkar ediblər. Ağır yaralı halda əvvəl Niksar Dövlət Xəstəxanasına çatdırılan qadın daha sonra Kayseridə yerləşən xəstəxanalardan birinə təxliyə olunub.

Həkimlərin bütün səylərinə baxmayaraq, Zübeydə Şimşəyin həyatını xilas etmək mümkün olmayıb.

Faktla bağlı araşdırma aparılır.

Telegramda izləyin