Qusarda oğul ona araq satmadığına görə anasını döydü

Qusarda oğul arağa görə anasını döyüb.

Sonxeber.az Lent.az-a istinadən xəbər verir ki, hadisə rayonun kəndlərindən birində baş verib.

39 yaşlı Yusif Əsgərov (ad və soyad şərtidir) səhər saatlarında kənd ərazisində qardaşına məxsus marketdən araq alaraq içib. O, sərxoş halda günorta saatlarında yenidən həmin marketə gələrək araq almaq istəyib. Lakin marketdə satıcı qismində olan anası ona araq satmaq istəməyib. Bu səbəbdən ana və oğul arasında mübahisə düşüb. Mübahisə zamanı oğul şillə, yumruq zərbələri ilə anasının sifət və baş nahiyələrinə vuraraq, xəsarətlər yetirib.

Bu əməlinə görə o saxlanılıb və barəsində cinayət işi açılıb.

Təqsirləndirilən şəxs ifadəsində əməlindən peşman olmasını və zərərçəkənlə barışdığını bildirib. Zərərçəkən də həmçinin oğlu ilə barışdığını və ona qarşı şikayətinin olmadığını deyib.

Məhkəmənin hökmü ilə Yusif Əsgərov 1000 manat məbləğində inzibati qaydada cərimələnib.

Telegramda izləyin