Qonşular arasında səs-küy davası cinayətlə nəticələndi

Afyonkarahisarda baş verən dəhşətli hadisə məişət zəminində yaranan mübahisələrin necə faciəvi nəticələrə gətirib çıxara biləcəyini bir daha göstərib.

Sonxeber.az türk mediasına istinadən xəbər verir, Türkiyənin Afyonkarahisar şəhərində xalça çırpma və səs-küy üstündə başlayan mübahisə qanlı cinayətlə yekunlaşıb. Hadisə şəhərin Örnekevler məhəlləsi, Fatih Gümüş küçəsində qeydə alınıb.

Məlumata görə, Sevimgül Bodur (66) və həyat yoldaşı Cemil Bodur (73) üst mərtəbədə yaşayan qonşuları Erhan İ. və Nursel İ. ilə səs-küy səbəbindən mübahisə ediblər. Qısa müddət sonra mübahisə davaya çevrilib. İddialara əsasən, Erhan İ. və Nursel İ. yaşlı cütlüyə qarşı tapança və nasoslu tüfənglə atəş açıblar.

Ağır yaralanan Sevimgül və Cemil Bodur hadisə yerinə çağırılan təcili tibbi yardım briqadaları tərəfindən xəstəxanaya çatdırılsa da, həkimlərin səylərinə baxmayaraq onların həyatını xilas etmək mümkün olmayıb.

Cinayəti törətməkdə şübhəli bilinən ər-arvad saxlanılaraq polis idarəsinə aparılıb. Onlar ilkin istintaq tədbirlərindən sonra səhər saatlarında məhkəməyə çıxarılmaq üçün ədliyyə orqanlarına təhvil verilib.

Faciə qurbanları üçün Paşa məscidində vida mərasimi keçirilib. Yaşlı cütlük günorta namazından sonra şəhər qəbiristanlığında torpağa tapşırılıb.

Hadisə ilə bağlı araşdırmalar davam edir.

Telegramda izləyin