Alış-veriş mərkəzlərinə giriş ödənişli olacaq?

Türkiyədə Alış-veriş mərkəzlərinə girişlərin ödənişli olacağı ilə bağlı yayılan iddialar cəmiyyətdə ciddi müzakirələrə səbəb olsa da, rəsmi qurumlar bu məlumatların həqiqəti əks etdirmədiyini açıqlayıb.

Sonxeber.az türk mediasına istinadən xəbər verir ki, Türkiyədə alış-veriş mərkəzlərinə girişin ödənişli olacağı barədə yayılan xəbərlər ictimaiyyətdə narahatlıq yaradıb. Bununla bağlı Cumhurbaşkanlığı İletişim Başkanlığı nəzdində fəaliyyət göstərən Dezenformasyonla Mücadele Merkezi (DMM) rəsmi açıqlama yayaraq iddiaları təkzib edib.

Açıqlamada bəzi media qurumları və sosial şəbəkə hesablarında yer alan məlumatların həqiqətə uyğun olmadığı vurğulanıb. Bildirilib ki, Ticaret Bakanlığı qeydiyyatlarında AVM-lərə girişin ödənişli edilməsi ilə bağlı hər hansı bir iş, bildiriş və ya hüquqi tənzimləmə mövcud deyil.

Rəsmi açıqlamada qeyd olunub: "Sosial şəbəkələrdə ‘Alışveriş Merkezleri ve Yöneticileri Başkanlığı’nın qərarı ilə AVM-lərə girişlərin ödənişli olacağı’ barədə yayılan iddialar tamamilə əsassızdır. Belə bir rəsmi qurum və ya ali şura mövcud deyil."

Bununla yanaşı, Alışveriş Merkezleri ve Yatırımcıları Derneği (AYD) tərəfindən də sektor iştirakçılarının bu istiqamətdə hər hansı qərar qəbul etmədiyi və yayılan məlumatların əsassız olduğu bildirilib.

Sonda vətəndaşlara ictimaiyyətdə çaşqınlıq yaratmaq məqsədi daşıyan bu cür yalan məlumatlara inanmamaq tövsiyə olunub.

Beləliklə, AVM-lərə girişin ödənişli olacağı ilə bağlı iddiaların həqiqəti əks etdirmədiyi bir daha təsdiqlənib.

Telegramda izləyin