İran Hörmüz boğazında iki gəmini saxladı - VİDEO

ABŞ-nin İrana qarşı dəniz təzyiqlərinin davam etdiyi bir vaxtda Tehran rəhbərliyi diqqətçəkən addım atıb. İran İslam İnqilabı Keşikçiləri Korpusu (SEPAH) Hörmüz boğazında iki gəminin saxlanılması ilə bağlı əməliyyat görüntülərini yayımlayıb.

Sonxeber.az xarici mediaya istinadən xəbər verir ki, yayılan kadrlarda SEPAH qüvvələrinin sürətli qayıqlarla gəmilərə yaxınlaşdığı, silahlı hərbçilərin isə gəmilərə daxil olaraq nəzarəti ələ keçirdiyi əks olunub.

Qurumun daha əvvəl yaydığı açıqlamada bildirilib ki, "MSC Francesca" (sionist rejimlə əlaqəli olduğu iddia olunur) və "Epaminondas" adlı iki gəmi lazımi icazələr olmadan hərəkət edib və dəniz təhlükəsizliyi sistemlərinə müdaxilə edərək gəmiçiliyin təhlükəsizliyini riskə atıb.

Bu səbəbdən gəmilər SEPAH-ın Dəniz Qüvvələri tərəfindən saxlanılaraq İran sahillərinə istiqamətləndirilib. Məlumata görə, hər iki gəmi nəzarət altına alınıb və İran sahillərinə yönləndirilib. Əməliyyatın dəqiq harada baş verdiyi isə açıqlanmayıb.

Açıqlamada vurğulanıb ki, Hörmüz boğazında təhlükəsizliyin pozulması İran üçün "qırmızı xətt" hesab olunur.

Telegramda izləyin