Niderlandlı futbolçunun qızı İstiqlal Marşını əzbər oxudu - VİDEO

Türkiyənin Süper Liqa komandalarından Antalyasporda çıxış edən niderlandlı futbolçu Sander van de Streek bu dəfə meydandakı oyunu ilə deyil, qızının duyğulandıran görüntüləri ilə gündəmə gəlib.

Sonxeber.az türk mediasına istinadən xəbər verir ki, "23 Aprel - Ulusal Egemenlik ve Çocuk Bayramı" münasibətilə keçirilən tədbirdən sonra evə qayıdan azyaşlı qız avtomobildə böyük həvəslə Türkiyənin dövlət himni olan İstiqlal Marşını səsləndirib.

Kiçik Van de Streekin marşın sözlərini diqqətlə və səlis tələffüz etməsi, eləcə də yaşadığı həyəcan atasının mobil telefonu ilə lentə alınıb. Hollandiya əsilli ailənin bu anları sosial mediada paylaşması qısa müddətdə geniş yayılıb.

Video türk futbolsevərlər tərəfindən böyük maraqla qarşılanıb, minlərlə bəyənmə və müsbət rəy toplayıb. Bu səmimi görüntülər sosial mediada günün ən çox danışılan mövzularından birinə çevrilib.

Telegramda izləyin