Mübahisə etdiyi qardaşını silahla öldürdü

Türkiyənin Çankırı vilayətində iki qardaş arasında baş verən mübahisə faciə ilə nəticələnib.

Sonxeber.az xarici mediaya istinadən xəbər verir ki, hadisə axşam saatlarında Yapraklı rayonunun Akyazı Caddesi küçəsində baş verib.

Məlumata görə, Vilayət Səhiyyə İdarəsində çalışan Hasan Hurşit ilə qardaşı Recep Hurşit arasında naməlum səbəbdən mübahisə yaranıb.

Mübahisənin böyüməsi ilə tərəflər arasında əlbəyaxa dava düşüb. Bu zaman Recep Hurşit yanında olan tapança ilə qardaşına atəş açıb.

Silah səslərini eşidən ətrafdakıların məlumat verməsindən sonra hadisə yerinə polis və təcili tibbi yardım əməkdaşları cəlb olunub. Ağır yaralanan Hasan Hurşit ilkin tibbi yardımdan sonra xəstəxanaya çatdırılıb. Lakin həkimlərin bütün səylərinə baxmayaraq onun həyatını xilas etmək mümkün olmayıb.

Hadisədən sonra qaçan Recep Hurşit polis əməkdaşlarının keçirdiyi əməliyyat nəticəsində qısa müddətdə saxlanılaraq nəzarətə götürülüb. Faktla bağlı genişmiqyaslı araşdırma aparılır.

Telegramda izləyin