İki ayrı müəssisədən seyf oğurluğu edən dəstə saxlanılıb

Bursada iki müəssisədən seyfləri oğurlayan maskalı dəstə saxlanıldı

Türkiyənin Bursa vilayətinin Kestel rayonunda iki ayrı müəssisədə baş verən seyf oğurluğu hadisələri jandarma əməkdaşlarının iki ay davam edən araşdırması nəticəsində açılıb.

Sonxeber.az türk mediasına istinadən xəbər verir ki, 2026-cı ilin fevral ayında baş verən oğurluq hadisələri zamanı müəssisələrdən ümumilikdə 2 milyon lirə dəyərində maddi ziyan vurulub. Bunun ardından Bursa İl Jandarma Komandanlığına bağlı qruplar genişmiqyaslı araşdırmaya başlayıb.

İstintaq çərçivəsində rayon ərazisində yerləşən təhlükəsizlik kameralarının görüntüləri bir-bir incələnib. Ümumilikdə 126 saatlıq video qeydlərə baxılıb, həmçinin 16 min avtomobil nömrəsi yoxlanılıb.

Toplanan dəlillər əsasında hadisələrdə iki fərqli avtomobildən istifadə olunduğu müəyyən edilib. Sonrakı mərhələdə həmin nəqliyyat vasitələrinin hərəkət marşrutları izlənilib, texniki və fiziki nəzarət tədbirləri gücləndirilib.

Araşdırma zamanı şübhəlilərin hadisədən əvvəl ərazidə kəşfiyyat apardıqları, gecə saatlarında müəssisələrə daxil olaraq seyfləri oğurladıqları və qısa müddətdə ərazidən uzaqlaşdıqları müəyyən olunub.

Toplanan bütün məlumatlar əsasında kimlikləri müəyyən edilən 5 nəfərə qarşı eyni vaxtda əməliyyat keçirilib. Saxlanılan şəxslərdən 4-ü məhkəmə qərarı ilə həbs edilib, 1 nəfər isə məhkəmənin qərarı ilə nəzarət şərti ilə sərbəst buraxılıb.

Qeyd edək ki, oğurluq anları müəssisələrin təhlükəsizlik kameraları tərəfindən saniyə-saniyə qeydə alınıb.

Telegramda izləyin