Bu ağrı xərçəngin əlaməti ola bilər: onkoloqlardan XƏBƏRDARLIQ

Həkimlər mədəaltı vəzi xərçənginin ən çox diqqətdən kənarda qalan əlamətlərindən birini açıqlayıblar - uzun müddət davam edən küt bel ağrısı. Qeyri-müəyyən əlamətlərə görə bu xəstəlik çox vaxt gec mərhələdə aşkar edilir. İnsanların tez-tez yorğunluq, narahat duruş və ya əzələ dartılması ilə əlaqələndirdiyi davamlı, sızıltılı bel ağrısı bəzi hallarda mədəaltı vəzi xərçəngindən xəbər verə bilər.

Lent.az xarici mediaya istinadən xəbər verir ki, həkimlər bu əlaməti görməzlikdən gəlməmək barədə xəbərdarlıq edir, çünki xəstəlik çox vaxt artıq irəliləmiş mərhələdə diaqnoz qoyulur.

Onkoloqlar izah edir ki, mədəaltı vəzi xərçəngini erkən mərhələdə aşkar etmək çətindir, çünki onun əlamətləri çox vaxt zəif ifadə olunur və tədricən yaranır. Pasiyentlərin tez-tez qiymətləndirmədiyi ən yayılmış siqnallardan biri qarının yuxarı hissəsində və ya beldə keçməyən davamlı və ya küt ağrıdır.

Mədəaltı vəzi qarın boşluğunda, onurğaya yaxın dərinlikdə yerləşir. Buna görə də ağrı qarından çox bel nahiyəsinə yayıla bilər və bu səbəbdən tez-tez fiziki yüklənmə və ya əzələ problemi kimi qəbul edilir. Xüsusilə hərəkət və fiziki aktivliklə əlaqəli olmayan, uzun müddət davam edən ağrılara diqqət yetirmək lazımdır.

İnsanların çox vaxt fərqinə varmadığı digər əlamətlərə səbəbsiz çəki itkisi, davamlı yorğunluq, iştahanın azalması, sarılıq və həzm problemləri daxildir. Bu əlamətlər daha yüngül xəstəlikləri xatırlada bildiyi üçün pasiyentlər çox vaxt həkimə müraciəti gecikdirirlər.

Ekspertlər qeyd edir ki, bel ağrısı əksər hallarda xərçənglə əlaqəli olmasa da, qeyri-adi və ya uzunmüddətli əlamətləri diqqətdən kənarda qoymaq olmaz.

Telegramda izləyin