17 yaşlı oğlan 5 il əvvəl atasını döyən şəxsi öldürüb

Bursada 17 yaşlı gənc 5 il əvvəl atasını döydüyünü iddia etdiyi şəxsi güllələdi: ölən var

Türkiyənin Bursa vilayətində 17 yaşlı yeniyetmə 5 il əvvəl atasını döydüyünü iddia etdiyi şəxsi ov tüfəngi ilə vuraraq öldürüb.

Sonxeber.az türk mediasına istinadən xəbər verir ki, hadisə İnegöl rayonunun Sinanbey məhəlləsi, 22-ci Metal küçəsində yerləşən iş yerində aprelin 30-u saat 13:30 radələrində baş verib.

Məlumata görə, 5 il əvvəl Ahmet Demir (51) ilə Ergün Ş. (50) arasında naməlum səbəbdən dava düşüb. Həmin vaxt Ahmet Demirin Ergün Ş.-ni döydüyü iddia olunub. Bu hadisəyə görə kin saxlayan Ergün Ş.-nin oğlu Ömer İsa Ş. (17), atasını döydüyünü düşündüyü şəxsi avtotəmir sexində görüb.

Bundan sonra geri qayıdan yeniyetmə tüfəng götürərək dostu Alparslan C.-nin (18) idarə etdiyi avtomobillə hadisə yerinə gəlib. O, əlindəki ov tüfəngi ilə Ahmet Demirə dəfələrlə atəş açıb.

Hücum zamanı bədəninə dəyən qəlpələr səbəbindən ağır yaralanan Ahmet Demir qan içində yerə yıxılıb. Şübhəlilər isə gəldikləri avtomobillə hadisə yerindən qaçıblar.

Yaralı əvvəlcə İnegöl Dövlət Xəstəxanasına, daha sonra isə Bursa Yüksək İxtisas Təhsil və Araşdırma Xəstəxanasına aparılıb. Reanimasiya şöbəsində müalicə alan Ahmet Demir həkimlərin bütün səylərinə baxmayaraq həyatını itirib.

Hadisədən sonra əməliyyata başlayan polis əməkdaşları Ömer İsa Ş. və Alparslan C.-ni saxlayaraq nəzarətə götürüblər.

Ömer İsa Ş. ifadəsində atasının 5 il əvvəl döyüldüyünü, həmin şəxsdən qisas almağı düşündüyünü və onu gördükdə atəş açdığını bildirib.

Məhkəməyə çıxarılan şübhəlilərdən Ömer İsa Ş. barəsində həbs qətimkan tədbiri seçilib. Alparslan C. isə məhkəmənin qərarı ilə məhkəmə nəzarəti şərti ilə sərbəst buraxılıb.

Telegramda izləyin