Uzunömürlülüyü müəyyən edən sadə test: Cəmi bir hərəkətlə sağlamlığınızı yoxlayın

Amerikalı teleaparıcı və revmatoloq Natali Azar uzunömürlülüyü proqnozlaşdırmaq üçün sadə test açıqlayıb.

Oxu.Az xəbər verir ki, sağlamlığın qiymətləndirilməsi metodu barədə "UpWorthy" nəşri məqalə dərc edib.

Azarın sözlərinə görə, bu test xüsusilə 51-80 yaş aralığında olan insanlar üçün uyğundur. Testi yerinə yetirmək üçün əvvəlcə ayaq üstə durmaq, daha sonra ayaqları çarpazlaşdıraraq yerə oturmaq və yenidən ayağa qalxmaq lazımdır. Bu zaman əsas şərt qollarla hər hansı bir yerə söykənməmək, bədən gövdəsi və ayaqlardan başqa heç bir üzvdən dəstək almamaqdır.

Natali Azar izah edib ki, bu metod ürək sağlamlığını, tarazlığı, çevikliyi, eləcə də bel və ayaq əzələlərinin gücünü qiymətləndirməyə imkan verir. Test üzrə maksimum nəticə 10 baldır. Əgər şəxs oturub-qalxarkən qoluna, dizinə və ya ombasına söykənirsə, yaxud əlini dizinin üzərinə qoyursa, hər belə hal üçün bir bal çıxılır.

"Tədqiqatlar göstərib ki, aşağı nəticə yaxın altı il ərzində ölüm riskini yeddi dəfə artırır. Səkkiz və daha yuxarı bal isə sağlamlıq üçün ideal göstərici hesab olunur", - deyə revmatoloq qeyd edib.

Telegramda izləyin