"Analar Günü" reklamı qalmaqala səbəb oldu: yayından qaldırıldı - VİDEO

Bosch Türkiye tərəfindən Analar Günü münasibətilə hazırlanan reklam çarxı sosial şəbəkələrdə geniş müzakirələrə səbəb olduqdan sonra yayından çıxarılıb.

Sonxeber.az türk mediasına istinadən xəbər verir ki, "Tam bir ana hekayəsi" başlığı ilə yayımlanan reklamda mağaza daxilində iki qadının dialoqu üzərindən analıq mövzusu təqdim olunub. Dialoq zamanı söhbətin uşaqlardan getdiyi təəssüratı yaransa da, sonda "uşaq" kimi təqdim edilənlərin ev heyvanları olduğu məlum olur. Məhz bu yanaşma sosial mediada istifadəçilər tərəfindən tənqid edilib. Reklamda səslənən "siz də anasınız yəqin", "məndə də iki dənə var" və "uşaqdır da" kimi ifadələr narazılığın əsas səbəbi olub.

Məsələyə münasibət bildirən Mahinur Özdemir Göktaş analıq anlayışının bu cür təqdim olunmasının qəbuledilməz olduğunu vurğulayıb. O qeyd edib ki, analıq sevgisi və məsuliyyəti dərin və fundamental bir dəyərdir və reklam dili ilə sadələşdirilə bilməz. Nazir əlavə edib ki, uşağı sevgi ilə böyüdən, qoruyan və gələcəyə hazırlayan hər bir qadın - istər bioloji, istərsə də himayəçi - əsl anadır və bu anlayış cəmiyyətin davamlılığının əsasını təşkil edir.

Digər tərəfdən, Radyo ve Televizyon Üst Kurulu (RTÜK) sədri Mehmet Daniş də məsələ ilə bağlı açıqlama verərək reklam haqqında araşdırmalara başlanıldığını bildirib. Onun sözlərinə görə, ana-övlad münasibəti insan həyatının ən dərin və əvəzolunmaz bağlarından biridir və bu anlayışın kommersiya məqsədləri ilə sadələşdirilməsi yolverilməzdir.

Qeyd edək ki, şirkət tərəfindən hadisə ilə bağlı hələlik rəsmi açıqlama verilməyib.

Telegramda izləyin