Amerikalı turist Çində 29-cu mərtəbədən yıxılıb öldü

Hong Kong şəhərində 69 yaşlı amerikalı turistin lüks hotelin 29-cu mərtəbəsindən yıxılması faciə ilə nəticələnib.

Sonxeber.az xarici mediaya istinadən xəbər verir ki, hadisə şəhərin sıx ticarət bölgələrindən biri olan Wan Chai ərazisində yerləşən Hotel Indigo Hong Kong Island hotelində baş verib. Bildirilir ki, qadın səhər saatlarında otelin hovuz mərtəbəsinə qalxdıqdan qısa müddət sonra aşağı düşüb.

Qadının yerə çırpılması nəticəsində otelin giriş hissəsindəki şüşə panellər dağılıb. Qırılan şüşə parçaları ətrafdakı insanlara xəsarət yetirib. Yaralananlar arasında 74 yaşlı qadın, onun 77 yaşlı bacısı, iki uşaq, iki ana və 89 yaşlı amerikalı qadının olduğu bildirilib.

Polis mənbələrinin iddiasına görə, həyatını itirən turist depressiya müalicəsi alırmış və mart ayında qəbul etdiyi dərmanları dayandırıbmış. Həmçinin qadının həyat yoldaşının hadisədən təxminən bir saat əvvəl həkim qəbuluna getmək üçün oteldən ayrıldığı qeyd olunub.

Faciənin baş verdiyi Hotel Indigo Hong Kong Island şüşə döşəməli dam hovuzu və gecə işıqlandırmaları ilə tanınan məşhur lüks hotellərdən biri hesab olunur. Otel 2013-cü ildə "Hong Kongun ən yaxşı otel memarlığı" mükafatına layiq görülüb. Xüsusilə "əjdaha mövzulu" xarici dizaynı və şüşə hovuzu turistlərin böyük marağına səbəb olur.

Telegramda izləyin