Qonşusunu öldürən kişi polisləri görüb intihar etdi

Türkiyənin Yalova vilayətinin Çınarcık rayonunda iki qonşu arasında baş verən mübahisə faciə ilə nəticələnib.

Sonxeber.az türk mediasına istinadən xəbər verir ki, hadisə Çınarcık rayonunun Kocadere kəndində baş verib. Məlumata görə, qonşular arasında əvvəlcə kənd çayxanasında mübahisə yaranıb. Mübahisədən sonra İlhan Deniz ərazidən uzaqlaşıb və qonşusu Özcan Özdilerin evə qayıtmasını gözləyib.

Özcan Özdiler gecə saatlarında evinə gəldiyi zaman İlhan Deniz ona tapança ilə atəş açıb. Bədəninə 4 güllə dəyən Özdiler hadisə yerində həyatını itirib.

Cinayətdən sonra hadisə yerindən qaçan şübhəlinin saxlanılması üçün jandarma əməkdaşları əməliyyata başlayıb. İlhan Denizin evində gizləndiyi müəyyən edilib. Hüquq-mühafizə orqanlarının əməkdaşlarını görən şəxs eyni silahla başına atəş açaraq intihar edib.

Həlak olan Özcan Özdilerin İstanbulda yaşadığı, Kocadere kəndindəki evindən isə yay evi kimi istifadə etdiyi bildirilib.

Faktla bağlı araşdırma davam edir.

Telegramda izləyin