Keçmiş ər qızının məktəbinə getdi: "Həm qızımı, həm arvadımı öldürəcəm"

Türkiyənin Konya şəhərində boşanma mərhələsində olduğu həyat yoldaşını ölümlə hədələdiyi iddia edilən inşaat mühəndisi, haqqında uzaqlaşdırma qərarı olmasına baxmayaraq 16 yaşlı qızının məktəbinə gedib. "Həm uşaq qatili, həm də həyat yoldaşı qatili olacağam" dediyi iddia olunan şəxs saxlanıldıqdan sonra sərbəst buraxılıb.

Sonxeber.az xarici mediaya istinadən xəbər verir ki, Mustafa A. boşanma prosesində olduğu akademik həyat yoldaşı Ayşe A. və qızını bir müddətdir təhdid edib. Məhkəmə mayın 5-də onun barəsində 3 aylıq uzaqlaşdırma qərarı çıxarsa da, kişinin təhdidlərini davam etdirdiyi bildirilib.

Məlumata görə, o, liseydə oxuyan qızına "O məktəb başınıza uçacaq" mesajı göndərib, daha sonra isə sevgilisi ilə birlikdə məktəbə gedib. Hadisə zamanı məktəbdə panika yaşandığı, şagirdlərin qorxu keçirdiyi qeyd olunub.

Ayşe A. ifadəsində keçmiş həyat yoldaşının onu öldürəcəyi ilə bağlı yaxınlarına danışdığını bildirib. 16 yaşlı qız isə atasının məktəbdə qışqıraraq təhdidlər səsləndirdiyini və çox qorxduğunu deyib.

Ana və qız polisə təqdim etdikləri mesajlarda "Sizin canınızı alaram" kimi ifadələrin yer aldığını bildirib. Mustafa A. barəsində uzaqlaşdırma qərarını pozma, təhdid və təhqir maddələri ilə araşdırma aparılıb. Buna baxmayaraq, o, polis bölməsindəki prosedurlardan sonra sərbəst buraxılıb.

Telegramda izləyin