Çernobılda insanların tərk etdiyi ərazidə heyvanların sayı artıb

Alimlərin apardığı yeni araşdırma Çernobıl faciəsindən sonra insanların tərk etdiyi ərazilərdə vəhşi heyvanların sayının nəzərəçarpacaq dərəcədə artdığını ortaya qoyub.

BAKU.WS xəbər verir ki, araşdırmaya əsasən, bölgədə canavarlar, boz ayılar, vaşaqlar, marallar və vəhşi atlar geniş şəkildə yayılıb.

1986-cı ildə baş verən Çernobıl nüvə qəzasından sonra yaradılan 30 kilometrlik qadağan zonası hazırda dünyanın ən radioaktiv ərazilərindən biri hesab olunur. Lakin mütəxəssislər bildirirlər ki, insanların bölgədən uzaqlaşması vəhşi təbiət üçün gözlənilməz sığınacaq yaradıb.

Almaniyanın Frayburq Universitetinin rəhbərlik etdiyi tədqiqat qrupu 2020 və 2021-ci illərdə Ukraynanın şimalında yerləşən təxminən 60 min kvadratkilometrlik ərazidə müşahidə kameraları quraşdırıb.

Tədqiqat zamanı qırmızı maral, çöl donuzu, boz ayı, canavar, Avropa vaşağı və Prjevalski atı da daxil olmaqla 13 vəhşi heyvan növü qeydə alınıb.

Araşdırma çərçivəsində əldə olunan 31 mindən çox görüntünün təxminən 20 mini birbaşa Çernobıl mühafizə zonasında çəkilib.

Alimlər bildiriblər ki, xüsusilə iri məməlilər insan fəaliyyətinə qarşı həssasdır və insanların bölgəyə daxil olduğu dövrlərdə heyvan müşahidələri azalır.

Mütəxəssislərin fikrincə, insan təsirinin azalması ekosistemin bərpasına ciddi şəkildə müsbət təsir göstərib.

Qeyd olunub ki, Rusiyanın 2022-ci ildə Ukraynaya müdaxiləsindən sonra bölgədə araşdırma aparmaq daha da çətinləşib və gələcək tədqiqatlar məhdudlaşa bilər.

Telegramda izləyin