Britaniyada ölümcül qan xərçəngi diaqnozu qoyulan kişi yeddi ildən sonra həqiqəti öyrəndi

Britaniyada ailə başçısı olan kişi əslində mövcud olmayan sağalmaz xərçəngdən yeddi il ağır müalicə alıb.

Oxu.Az-ın xəbərinə görə, bu barədə "Mirror" nəşri yazıb.

Məlumata görə, 41 yaşlı Saymon Pirson adlı şəxsə nadir qan xərçəngi növü və genetik xəstəlik diaqnozu qoyulub, amma sonradan onun sağlam olduğu məlum olub.

İynələrdən qorxmasına baxmayaraq, kişi 42 dəfə ağrılı qan pompalanması prosedurandan keçib və bunun onu ölümdən xilas edəcəyini düşünüb. Yalnız yeddi ildən sonra tibb bacısı səhvdən şübhələnib və analizlər xəstədə heç bir xəstəliyin olmadığını təsdiqləyib.

Saymon etiraf edib ki, illər ərzində yuxusuz qalıb, ölməkdən və xəstəliyi uşaqlarına ötürməkdən qorxub. Onun sözlərinə görə, həkimlər qəfildən heç vaxt xəstə olmadığını elan etdikdə reallıqla əlaqəsini itirib və indi məhkəmə vasitəsilə ədalət tələb edir.

Xəstəxana artıq rəsmi şəkildə üzr istəyib, klinik səhvlər səbəbindən xəstəyə zərər verdiyini etiraf edib. Həkimlər səbəbi araşdıracaqlarına və belə bir hadisənin bir daha baş verməməsi üçün əllərindən gələni edəcəklərinə söz veriblər.

Telegramda izləyin