Dünya turuna çıxan fransız ailə velosipedlə Konyaya çatdı

Fransadan velosipedlə dünya səyahətinə çıxan beş nəfərlik ailə Türkiyə marşrutu çərçivəsində Konyaya çatıb.

Sonxeber.az xəbər verir ki, Tomas və Estel Dalmayrak cütlüyünün üç övladı ilə birlikdə həyata keçirdiyi səyahət Avropa və Şimali Afrika ölkələrini əhatə edir. Ailə 2025-ci ilin avqustunda Fransadan yola düşüb.

Təxminən üç həftə əvvəl Türkiyəyə daxil olan səyahətçilər Fethiyə, Pamukkale, Burdur, Tuz Gölü bölgəsi və Beyşehirdən keçərək Konyaya qədər velosiped sürüblər. Onların Türkiyədəki növbəti dayanacağının Kapadokiya olacağı bildirilir.

Dalmayrak ailəsi səyahət zamanı yay fəslinin ən isti dövrünü İrlandiyada keçirib, daha sonra bərə ilə İspaniyaya, oradan isə Portuqaliyaya yollanıb. Ailə Milad bayramını Mərakeşdə qeyd edib. Onlar Atlas dağlarının cənubunda yerləşən Aqadirdən Zaqoraya qədər velosipedlə hərəkət etdikdən sonra marşrutlarını şimala doğru davam etdiriblər.

Səyahət daha sonra Sardiniya və Yunanıstan üzərindən Türkiyəyə qədər uzanıb.

Tomas Dalmayrak Türkiyədə insanların qonaqpərvərliyindən böyük məmnunluq duyduqlarını bildirib.

Qeyd edək ki, Dalmayrak cütlüyü uzunmüddətli velosiped səyahətlərinə hələ 2014-cü ildə, övlad sahibi olmamışdan əvvəl başlayıb. Həmin vaxt onlar Fransadan İstanbula qədər velosipedlə gedib, daha sonra Banqkoka uçaraq Tailand, Kamboca, Laos, Vyetnam, Çin, Monqolustan və Rusiya üzərindən yenidən Fransaya qayıdıblar.

Ailə "Təkərə doğru" adlandırdıqları yeni layihə ilə aşağı karbon emissiyalı səyahəti təşviq etməyi, dünyanı kəşf etməyin alternativ yollarını nümayiş etdirməyi və ailəvi velosiped səyahətlərinin təcrübəsini paylaşmağı qarşıya məqsəd qoyub.

Telegramda izləyin