Tövləyə girən küçə itləri 30 toyuğu tələf edib - VİDEO

Türkiyənin Bursa vilayətinin Mudanya rayonunda sahibsiz itlərin hücumu nəticəsində bir həyət evindəki tövlədə 30 toyuq tələf olub.

Sonxeber.az xarici mediaya istinadla xəbər verir ki, hadisə Güzəlyalı Sitelər məhəlləsində baş verib. Ərazidə dolaşan 3 sahibsiz it yaşayış kompleksinin bağçasındakı toyuq damına daxil olaraq təxminən 40 dəqiqə ərzində toyuqlara hücum edib. Nəticədə 30 toyuq ölüb, yalnız 2-si sağ qalıb. İtlərin daha sonra yaxınlıqdakı başqa bir toyuq damına girərək daha 3 toyuğu parçaladığı bildirilib.

Hadisə təhlükəsizlik kamerası tərəfindən qeydə alınıb. Toyuq damının sahibi Sevgi Türay bildirib ki, əsas narahatlıq itlərin uşaqlara zərər vermə ehtimalıdır. Onun sözlərinə görə, ərazidə yaşayan sakinlər uşaqların təhlükəsizliyindən ciddi şəkildə narahatdırlar.

Məhəllə sakinləri sahibsiz itlərin bölgədə tez-tez göründüyünü qeyd edərək, aidiyyəti qurumlardan problemin həlli üçün tədbir görülməsini istəyiblər.

Telegramda izləyin