Meşədə meyiti tapılan qadın 11 aydır itkin düşən məşhur elm adamı imiş

ABŞ-ın Nyu-Meksiko ştatında təxminən 11 aydır itkin düşən 54 yaşlı Melissa Kasiasın meyiti meşəlik ərazidə tapılıb.

Sonxeber.az xarici mediaya istinadla xəbər verir ki, Kasias ABŞ-ın ən mühüm elmi-tədqiqat mərkəzlərindən biri olan Los Alamos Milli Laboratoriyasının əməkdaşı olub. Onun meyiti mayın 28-də aşkar edilib və şəxsiyyəti aparılan ekspertizadan sonra təsdiqlənib.

Hadisə yerində tapança da aşkar olunsa da, ölüm səbəbi hələ müəyyənləşdirilməyib. Faktla bağlı araşdırma davam etdirilir.

Melissa Kasiasdan sonuncu dəfə 2025-ci ilin iyun ayında xəbər alınmışdı. İtkin düşdüyü vaxt onun telefonunun və pulqabısının da yanında olmadığı bildirilmişdi.

Kasiasın ölümü ABŞ-da son illərdə elm adamlarının müəmmalı ölüm və itkin düşmə halları ilə bağlı müzakirələri yenidən gündəmə gətirib. Məlumatlara görə, son iki ildə nüvə və kosmik tədqiqatlarla əlaqəli 11 alim ya həyatını itirib, ya da itkin düşüb. ABŞ rəsmiləri hadisələr arasında birbaşa əlaqə olduğunu təsdiqləməsələr də, məsələ ilə bağlı araşdırmaların aparıldığı bildirilir.

Telegramda izləyin