"İlham Əliyevin çıxışı qlobal enerji siyasətində yeni baxış ortaya qoyub" - POLİTOLOQ

"Prezident İlham Əliyevin 2026-cı il 1 iyun tarixində Bakı Enerji Həftəsinin açılışındakı proqram xarakterli çıxışı, sadəcə regional deyil, qlobal enerji siyasətinin fəlsəfəsini yenidən formalaşdıran geostrateji manifest xarakteri daşıyır. Dövlət başçısının təhlili 30 il əvvəl əsası qoyulmuş strateji kursun retrospektiv qiymətləndirilməsi ilə yanaşı, bu gün dünyada süni şəkildə formalaşdırılan birtərəfli iqlim ritorikasına qarşı rasional və praqmatik alternativ təklif edir. Bu çıxışın siyasi anatomiyası sübut edir ki, rəsmi Bakı qlobal enerji bazarındakı mövqeyini yalnız resurs ixracatçısı kimi deyil, beynəlxalq münasibətlər sistemində ideoloji və intellektual trend müəyyənləşdiricisi olaraq möhkəmləndirir", - bunları Sonxeber.az -a açıqlama verən politoloq Tural İsmayılov deyib:

"Azərbaycan liderinin düz 30 il əvvələ - 1996-cı ilin iyununda imzalanmış "Şahdəniz" müqaviləsinə və müasir Bakı Enerji Həftəsinin bünövrəsini qoymuş Xəzər Neft və Qaz Sərgisinə etdiyi istinad, ölkənin dövlət müstəqilliyinin iqtisadi sütunlarının təsadüfi qərarlar deyil, dərin riyazi və geosiyasi hesablamalar üzərində qurulduğunu göstərir. Vaxtilə yalnız bir sərgi kimi başlayan prosesin bu gün qlobal enerji təhlükəsizliyinin taleyini müəyyən edən genişmiqyaslı platformaya çevrilməsi, Azərbaycanın milli maraqlara əsaslanan müdrik siyasətinin məntiqi nəticəsidir. Bu kontekstdə, ABŞ Prezidenti Donald Trampın, Türkiyə Prezidenti Rəcəb Tayyib Ərdoğanın və Böyük Britaniyanın Baş naziri Kirl Starmerin tədbirə xüsusi məktub göndərmələri rəsmi Bakının beynəlxalq güc mərkəzləri arasında qazandığı sarsılmaz etimadın və asimmetrik diplomatik nüfuzun vizual sübutudur.

Çıxışın ən cəsarətli və qlobal rezonans doğuran hissəsi isə son illərdə neft və qaz hasil edən ölkələrə qarşı yürüdülən qeyri-obyektiv, populist və bəzən manipulyativ "qarayaxma" kampaniyalarına qarşı yönələn kəskin tənqiddir. Prezident İlham Əliyev real dünyanın iqtisadi və fiziki qanunauyğunluqlarını ön plana çəkərək bəyan edir ki, dünya faydalı qazıntı olmadan yaşaya bilməz və karbohidrogen resurslarına malik olmaq dövlətlərin günahı deyil, təbii coğrafi üstünlüyüdür. Bu xüsusda, ABŞ Prezidenti Donald Trampın müdrik və praqmatik siyasəti sayəsində enerji məsələsinin yenidən normal, rasional məcraya qayıtmasının xüsusi vurğulanması təkcə siyasi jest deyil, həm də Vaşinqton və Bakının qlobal iqtisadi reallıqlara eyni praqmatik prizmadan baxdığının nümayişidir. Bəzi nəhəng korporasiyaların sırf müasir trendlərə xoş görünmək üçün adlarını dəyişdiyi bir dövrdə, Azərbaycan liderinin reallığı açıq şəkildə ifadə etməsi qlobal miqyasda siyasi realizmin və dürüstlüyün qələbəsidir.

Dövlət başçısı beynəlxalq birliyə tamamilə yeni bir qiymətləndirmə meyarı və mənəvi-siyasi standart təklif edir: ölkələr neft və qazın mövcudluğuna görə deyil, bu resurslardan əldə olunan gəlirləri necə idarə etdiklərinə görə mühakimə olunmalıdır. Azərbaycanın bu sahədə bariz bir nümunə kimi təqdim edilməsi tamamilə əsaslıdır; çünki rəsmi Bakı enerjidən qazandığı vəsaitləri xalqın rifahına, ölkənin infrastrukturunun modernləşdirilməsinə və ən önəmlisi, məhz bərpaolunan, yaşıl enerji layihələrinə transfer edir. Yəni, karbohidrogen gəlirləri yaşıl gələcəyin maliyyə mənbəyinə çevrilir. Nəticə etibarı ilə, Prezident İlham Əliyevin bu çıxışı Bakı Enerji Həftəsinin sadəcə bir biznes sərgi olmadığını, həm də iqlim naminə populist şüarlarla real iqtisadiyyat arasındakı balansı tənzimləyən, planetin qorunması ilə enerji təhlükəsizliyini sintez edən universal bir strateji doktrina olduğunu bütün dünyaya elan edir".

Telegramda izləyin