Taksi dayanacağına bıçaqlı hücum: 3 yaralı var

Ankaranın Altındağ rayonunda bir qrup əlində bıçaq və dəyənəklərlə taksi dayanacağına hücum edib. Hadisə nəticəsində 3 taksi sürücüsü yaralanıb.

Sonxeber.az türk mediasına istinadən xəbər verir ki, hadisə saat 03:30 radələrində baş verib. 37 AAZ 034 dövlət nömrə nişanlı avtomobillə taksi dayanacağına gələn qrup dayanacaqda olan sürücülərə hücum edib.

Aralarında qadınların da olduğu qrup əlindəki bıçaq və dəyənəklərlə sürücüləri döyüb, taksilərə də zərər verib. Daha sonra şübhəlilər həmin avtomobillə ərazidən uzaqlaşıblar.

Hadisə zamanı sürücülər Fahri G., Beytullah G. və Bülent K. yaralanaraq xəstəxanaya yerləşdirilib. Polis hadisə ilə bağlı araşdırma başladıb və hücumda iştirak edən 2 nəfər saxlanılıb.

Hücum anları təhlükəsizlik kameralarına da yansıyıb. Görüntülərdə qrupun avtomobillə gələrək dayanacaqdakı şəxslərə hücum etdiyi, bıçaq və dəyənəklərlə həm insanlara, həm də nəqliyyat vasitələrinə zərər verdiyi əks olunub.

Telegramda izləyin