"Azərbaycanın zəngin tarixi, ədəbiyyatı, musiqisi, incəsənəti müasir təqdimat üsulları ilə yeni nəsillərə çatdırılmalıdır" - AÇIQLAMA

"Son illərdə dünyada informasiya müharibələrinin, ideoloji təsir vasitələrinin və qlobal media platformalarının təsir imkanlarının artdığı bir şəraitdə elmi-kütləvi, mədəni-maarif və təhsil yönümlü proqramların hazırlanması hər bir dövlət üçün strateji əhəmiyyət daşıyan məsələlərdən birinə çevrilib. Bu baxımdan Azərbaycan da istisna deyil. Dövlətin humanitar və informasiya siyasətinin əsas istiqamətlərindən biri cəmiyyətin maarifləndirilməsi, milli-mənəvi dəyərlərin qorunması və gənc nəslin sağlam ideoloji əsaslar üzərində formalaşdırılmasıdır".

Bu sözləri Sonxeber.az-a Əməkdar jurnalist, Səs qəzetinin baş redaktoru Bəhruz Quliyev danışıb.

O, açıqlamasında qeyd edib ki, elmi-kütləvi və maarifləndirici məzmun təkcə bilik ötürən vasitə deyil, həm də milli kimliyin, vətəndaş məsuliyyətinin və dövlətçilik təfəkkürünün formalaşmasına xidmət edən mühüm platformadır:

"Əgər hər hansı ölkə öz informasiya məkanını keyfiyyətli milli məzmunla zənginləşdirmirsə, həmin boşluğu xarici təsirlər və yad ideoloji mərkəzlər doldurmağa çalışırlar.

Bu gün Azərbaycan cəmiyyətinin qarşısında duran əsas vəzifələrdən biri milli dəyərlərlə müasir inkişaf çağırışları arasında düzgün balansın yaradılmasıdır. Hazırlanan proqramlar xalqımızın tarixi yaddaşını, dövlətçilik ənənələrini, mədəni irsini, Qarabağ Zəfərinin yaratdığı yeni milli ruhu və Azərbaycançılıq ideologiyasını geniş auditoriyaya çatdırmalıdır. Xüsusilə, gənclərin milli köklərinə bağlı, eyni zamanda müasir dünyagörüşünə malik vətəndaşlar kimi yetişdirilməsi bu məzmunların əsas missiyalarından biri olmalıdır.

Mən hesab edirəm ki, gələcək dövrdə bir neçə strateji istiqamət prioritet olaraq diqqətdə saxlanılmalıdır. İlk növbədə, rəqəmsal platformalar üçün müasir formatlı, interaktiv və gənclərin maraqlarına uyğun layihələrin hazırlanması vacibdir. Artıq ənənəvi televiziya ilə yanaşı, sosial media, onlayn platformalar və yeni media resursları maarifləndirmə işinin əsas vasitələrindən birinə çevrilib.

İkinci mühüm istiqamət informasiya savadlılığının artırılmasıdır. Dezinformasiyanın və saxta xəbərlərin geniş yayıldığı bir dövrdə vətəndaşların məlumatları təhlil etmək, doğru ilə yanlışı ayırmaq bacarıqlarının inkişaf etdirilməsi dövlət təhlükəsizliyi baxımından da əhəmiyyətlidir. Bu məqsədlə maarifləndirici proqramlar media savadlılığı mövzularını daha geniş şəkildə əhatə etməlidir.

Üçüncü istiqamət milli-mədəni irsin təbliğidir. Azərbaycanın zəngin tarixi, ədəbiyyatı, musiqisi, incəsənəti və folkloru müasir təqdimat üsulları ilə yeni nəsillərə çatdırılmalıdır. Çünki qloballaşma şəraitində milli kimliyin qorunmasının ən effektiv yolu onun müasir formada təqdim edilməsidir".

Bəhruz Quliyev onu da vurğuladı ki, elmi biliklərin sadə və anlaşıqlı dillə ictimaiyyətə çatdırılması da xüsusi əhəmiyyət kəsb edir:

"Elm, innovasiya, süni intellekt, texnologiya və müasir inkişaf tendensiyaları ilə bağlı layihələr ölkənin insan kapitalının inkişafına, rəqabət qabiliyyətinin yüksəlməsinə xidmət edir.

Ümumilikdə, elmi-kütləvi, mədəni-maarif və təhsil yönümlü proqramlar dövlətin humanitar siyasətinin ayrılmaz tərkib hissəsidir. Bu proqramlar yalnız məlumatlandırmaq funksiyası daşımır, həm də milli birliyin möhkəmləndirilməsinə, vətəndaş həmrəyliyinin gücləndirilməsinə, Azərbaycançılıq ideologiyasının təbliğinə və cəmiyyətin intellektual inkişafına xidmət edir. Məhz buna görə də milli maraqlara söykənən, peşəkar və müasir tələblərə cavab verən media məzmununun hazırlanması gələcək dövr üçün əsas prioritetlərdən biri olaraq qalmalıdır".

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "İnsan hüquq və azadlıqlarının müdafiəsi, vətəndaşların hüquqi, siyasi mədəniyyət səviyyəsinin yüksəldilməsi, sosial və siyasi fəallığının artırılması" mövzusuna uyğun olaraq dərc edilir.

Vüsalə İbrahimli

Telegramda izləyin