Elbəy Ağayevin masterklassı böyük maraqla qarşılandı - VİDEO

İyunun 8-də tanınmış saç ustası Elbəy Ağayevin təşkilatçılığı ilə Bakıda masterklass keçirilib. Tədbirə Azərbaycanla yanaşı, Qazaxıstan, Rusiya, Türkiyə və Gürcüstandan gələn peşəkarlar da qatılıblar.

Sonxeber.az xəbər verir ki, təşkilatçının sözlərinə görə, masterklassa ümumilikdə 331 nəfər iştirak edib. İştirakçı sayının çoxluğu səbəbindən bəzi qonaqlar tədbiri ayaqüstə izləməli olublar. Tədbirdə media nümayəndələri, sənət adamları, musiqiçilər və sahənin peşəkarları bir araya gəlib.

Masterklassdan sonra Elbəy Ağayev jurnalistlərə müsahibə verib. O, layihənin gələcək planlarından danışaraq bildirib ki, növbəti masterklassların ölkə xaricində keçirilməsi nəzərdə tutulur.

"Bu layihənin sərhədlərini genişləndirmək istəyirik. Qarşıdakı dövrdə masterklasslarımızı xaricdə də təşkil etməyi planlaşdırırıq. Gələn il üçün Dubayda masterklass keçirmək nəzərdə tutulur", - deyə o qeyd edib.

Elbəy Ağayev vurğulayıb ki, əsas məqsəd Azərbaycan saç sənayesinin inkişafına töhfə vermək və yerli mütəxəssislərin təcrübəsini daha geniş auditoriyaya təqdim etməkdir.

Telegramda izləyin