Balalarını qoruyan ana ayı dəhşət saçıb

Türkiyənin Bingöl vilayətində göbələk toplamaq üçün meşəyə gedən 32 yaşlı Sinan Şabahat ayı hücumuna məruz qalıb. Başını qolları ilə qoruyaraq sağ qalmağı bacaran gənc müxtəlif bədən xəsarətləri alıb.

Sonxeber.az xarici mediaya istinadla xəbər verir ki, hadisə Adaklı rayonunun Elmadüzü kəndi yaxınlığında baş verib.

Məlumata görə, Sinan Şabahat ərazidə iki balası ilə birlikdə olan ana ayı ilə qarşılaşıb. Qəfil hücuma məruz qalan kişi özünü qorumaq üçün qollarını başına sipər edib.

Ayının diş və caynaq zərbələri nəticəsində başından, qolundan və ayaqlarından yaralanan Şabahat bir müddət sonra balaların uzaqlaşması ilə təhlükədən xilas olub. Yaxınlarının köməyi ilə xəstəxanaya çatdırılan yaralının hazırda neyrocərrahiyyə şöbəsində müalicəsi davam edir.

Şabahatın qardaşı Mehmet Şabahat bildirib ki, qardaşı ölümdən dönüb. Onun sözlərinə görə, hadisədən sonra Sinan zəng edərək kömək istəyib və ailə üzvləri dərhal hadisə yerinə yollanıblar.

Həkimlər yaralının vəziyyətinin getdikcə yaxşılaşdığını açıqlayıblar.

Telegramda izləyin