Qaydaları pozan şirniyyat mağazası möhürləndi - VİDEO

Türkiyənin İstanbul şəhərinin Bahçelievler rayonunda keçirilən nəzarət tədbirləri zamanı gigiyena qaydalarına əməl etmədiyi və lisenziyasız fəaliyyət göstərdiyi müəyyən edilən şirniyyat mağazası möhürlənib.

Sonxeber.az türk mediasına istinadən xəbər verir ki, yoxlamalarda iştirak edən Bahçelievler bələdiyyəsinin sədri Hakan Bahadır obyekt sahibindən fəaliyyət üçün tələb olunan lisenziyanı təqdim etməsini istəyib. Lakin sahibkarın müvafiq sənədi təqdim edə bilmədiyi bildirilib.

Bələdiyyə sədri obyekt sahibi və onun telefonla əlaqə saxladığı mühasiblə söhbət zamanı qanunvericiliyin bütün sahibkarlar üçün eyni qaydada tətbiq olunduğunu vurğulayıb. O, heç kəsə xüsusi imtiyaz tanınmadığını və fəaliyyət göstərən bütün obyektlərin müəyyən edilmiş qaydalara riayət etməli olduğunu qeyd edib.

Aşkarlanan pozuntular əsasında obyektin fəaliyyəti dərhal dayandırılıb və mağaza möhürlənib. Yerli hakimiyyət orqanları rayon ərazisində yoxlamaların davam etdiriləcəyini və qaydalara əməl etməyən obyektlərə qarşı qanunvericiliyə uyğun tədbirlərin görüləcəyini açıqlayıblar.

Telegramda izləyin