Səbinə İskəndər - akvarel sənətinin inkişafına töhfə verən peşəkar rəssam və kurator

Səbinə İskəndər yerli və beynəlxalq bədii sərgilərin təşkili sahəsində zəngin təcrübəyə malik peşəkar rəssam və kuratordur. O, həm Azərbaycanda, həm də xarici ölkələrdə sərgilənən əsərləri, yaradıcı axtarışları və özünəməxsus bədii üslubu ilə seçilir.

Sonxeber.az xəbər verir ki, akvarel sənətinə xüsusi bağlılığı ilə tanınan Səbinə xanım klassik "yaş üzərində yaş" texnikasından mürəkkəb qarışıq üsullara qədər müxtəlif üslublarda uğurla çalışaraq rəng və duyğuların harmoniyasını yaradır.

Son yeddi il ərzində fəaliyyəti Beynəlxalq Akvarel Cəmiyyətinin yerli nümayəndəliyi olan "IWS Azerbaijan" ilə bağlı olan Səbinə İskəndər əvvəlcə həmsədr, daha sonra isə təşkilatın rəhbəri kimi mühüm layihələrə rəhbərlik edib. O, çoxsaylı sərgilərin, beynəlxalq mədəni tədbirlərin və yaradıcı layihələrin təşkilində mühüm rol oynayıb. Səbinə xanımın peşəkarlığı sərgi layihələrinin hazırlanması, ekspozisiyaların qurulması, kataloqların tərtib edilməsi və beynəlxalq rəssamlarla əməkdaşlığın təşkilində özünü göstərir.

12-14 iyun 2026-cı il tarixlərində Bakıda keçirilən və dünyanın 30 ölkəsindən sənətkarları bir araya gətirən "Caspian Waves 2026" Beynəlxalq Akvarel Festivalı da məhz Səbinə İskəndərin rəhbərliyi və təşkilatçılığı ilə həyata keçirilən mühüm mədəni layihələrdən biridir.

Festival çərçivəsində sərgilər, canlı rəsm performansları və müxtəlif mədəni proqramlar təşkil olunub.

Telegramda izləyin