Tromb təhlükəsi ilə bağlı xəbərdarlıq: Bu əlamətlərə laqeyd yanaşmayın

"İnfarkt, insult, ürək tutmaları və emboliyaların əsas səbəblərindən biri damarların trombla tıxanmasıdır. Tromb damar daxilində yaranan qan laxtasıdır və qan dövranını pozaraq həyati təhlükə yarada bilər".

Bu sözləri Sonxeber.az-a Tibb üzrə fəlsəfə doktoru, həkim Ramin Qasımov danışıb.

O, açıqlamasında qeyd edib ki, trombun xəbərçisi ola biləcək 6 əsas əlamət bunlardır:

"Ayaqlardan birinin şişməsi

Dərin venalarda tromb yarandıqda ayaqlardan birində şişkinlik və ödem meydana gələ bilər. Bu, həmin nahiyədə qan dövranının pozulması ilə əlaqədardır.

Ayaqlarda ağrı və uyuşma

Ayaqlarda ağırlıq hissi, uyuşma, qarışqa gəzməsi, iynəbatırma hissi və davamlı ağrılar trombun əlamətləri arasında yer alır.

Dəridə qırmızı xətlər

Damar boyunca uzanan qırmızı xətlər və ya qızarmış sahələr trombun yaratdığı reaksiyanın göstəricisi ola bilər.

Dərin nəfəs alarkən sinə ağrısı

Nəfəs alıb-verərkən döş qəfəsində yaranan ağrı və ya ağırlıq hissi qan laxtasının ağciyər damarlarına çatdığını göstərə bilər.

Səbəbsiz təngnəfəslik

Fiziki fəaliyyət olmadan yaranan nəfəs darlığı və başgicəllənmə də təhlükəli siqnallar sırasındadır.

Keçməyən quru öskürək

Heç bir infeksiya əlaməti olmadan başlayan və uzun müddət davam edən quru öskürək, xüsusilə də sinə ağrısı və təngnəfəsliklə müşayiət olunursa, diqqət tələb edir.

Bu əlamətlər müşahidə olunduqda vaxtında müayinədən keçmək mümkün ağır fəsadların qarşısını almağa kömək edə bilər".

Telegramda izləyin