Baş nazirlər dəyişdi, Larry qaldı: İngiltərənin ən məşhur pişiyi 6 hökumət başçısını yola salıb

İngiltərədə son 10 ildə seçkilər keçirilib, hökumətlər dəyişib, baş nazirlər vəzifələrini tərk edib. Lakin Londondakı Baş nazir iqamətgahının ən məşhur sakini bütün bu siyasi dəyişikliklərə baxmayaraq yerini qoruyub saxlayıb. Dauninq-Strit 10 ünvanının məşhur pişiyi Larry bu müddət ərzində 6 baş naziri yola salaraq Britaniya siyasətinin dəyişməyən simvollarından birinə çevrilib.

Bu barədə Sonxeber.az xarici mediaya istinadla xəbər verir.

Belə ki, baş nazirlər gəlib-getsə də, hökumətlər qurulub-dağılsa da, Baş nazir iqamətgahının ən sabit sakini vəzifəsinin başında qalıb. Dauninq-Stritin məşhur pişiyi Larry son illərdə ölkənin siyasi həyatında baş verən bütün mühüm dəyişikliklərin canlı şahidi olub.

2011-ci ildə Londondakı Battersea Heyvan Sığınacağından götürülərək Baş nazir iqamətgahında siçan probleminin həlli məqsədilə yerləşdirilən Larry həmin vaxtdan etibarən "xidmətini" davam etdirir. Onun rəsmi titulu isə "Nazirlər Kabinetinin Baş Siçan Ovçusu"dur. Larry İngiltərə tarixində bu titulu rəsmi şəkildə daşıyan ilk pişik kimi də qeydə alınıb.

Təxminən 15 ildir Dauninq-Stritdə yaşayan Larry bu müddətdə ölkənin altı baş naziri - David Cameron, Theresa May, Boris Johnson, Liz Truss, Rishi Sunak və son olaraq Keir Starmer dövründə iqamətgahın sakini olub.

Beləliklə, bir çox siyasətçidən daha uzun müddət vəzifədə qalan Larry təkcə ölkənin ən məşhur pişiklərindən biri deyil, həm də Britaniya siyasətinin ən maraqlı və dəyişməz simalarından biri hesab olunur.

Telegramda izləyin