"Silahlı Qüvvələr Günü tam suverenliyin təntənəsi kimi qeyd olunur" - AÇIQLAMA

"26 İyun - Azərbaycan Respublikasının Silahlı Qüvvələri Günü müasir Azərbaycan dövlətçiliyinin suverenlik, hərbi qüdrət və milli qürur kontekstində ən rəmzi və strateji əhəmiyyətli tarixlərindən biridir. Siyasi-strateji nöqteyi-nəzərdən bu tarix sadəcə bir təqvim günü deyil, Azərbaycanın müstəqil dövlət quruculuğu prosesində keçdiyi tarixi təkamülün və əldə etdiyi geosiyasi gücün təzahürüdür. 1918-ci ildə Azərbaycan Xalq Cümhuriyyəti tərəfindən əsası qoyulan və 1998-ci ildə Ümummilli Lider Heydər Əliyevin fərmanı ilə rəsmiləşdirilən bu gün dövlətin varislik prinsiplərinə sadiqliyinin və milli ordu quruculuğuna verilən fundamental önəmin göstəricisidir".

Bu sözləri Sonxeber.az-a politoloq Tural İsmayılov danışıb.

O, açıqlamasında qeyd edib ki, müasir mərhələdə Azərbaycan Silahlı Qüvvələri Cənubi Qafqazın ən hazırlıqlı, modern və döyüş qabiliyyətli hərbi gücü kimi qəbul olunur:

"Bu hərbi qüdrət respublikanın xarici siyasətində təmkinli, lakin qətiyyətli diplomatiya yürütməsi üçün ən mühüm arxa plana və güc amilinə çevrilmişdir. Azərbaycan Ordusunun müasir hərbi-texniki təchizatı, yüksək peşəkarlığı və döyüş taktikası dövlətin milli təhlükəsizlik arxitekturasının toxunulmazlığını təmin edən əsas qarantdır.

Xüsusilə son illərin hərbi-siyasi reallıqları, 44 günlük Vətən müharibəsi və ardınca həyata keçirilən strateji əməliyyatlar 26 İyun tarixinin mahiyyətini tamamilə yeniləmişdir. Silahlı Qüvvələr Günü artıq sadəcə bir potensialın nümayişi deyil, bərpa edilmiş ərazi bütövlüyünün və tam suverenliyin təntənəsi kimi qeyd olunur. Bu kontekstdə Müzəffər Ali Baş Komandan İlham Əliyevin rəhbərliyi altında formalaşan ordu-xalq-dövlət birliyi Azərbaycanın regional geosiyasi konfiqurasiyada öz şərtlərini diktə edən müstəqil aktor statusunu daha da sarsılmaz edir".

Vüsalə İbrahimli

Telegramda izləyin