Balkonda asılı qalan kişini xilasedicilər qurtardı - VİDEO

Antalyada üçmərtəbəli yaşayış binasında təhlükəli anlar yaşanıb. İkinci mərtəbədəki mənzilin eyvanından aşağı enməyə çalışan şəxs alt mərtəbənin eyvan məhəccərində asılı vəziyyətdə qalıb.

Sonxeber.az xarici mediaya istinadla xəbər verir ki, hadisə saat 16:30 radələrində Ulus məhəlləsi, 2105-ci küçədə yerləşən üçmərtəbəli binada baş verib. Bildirilir ki, O.A. adlı şəxs ikinci mərtəbədəki mənzilin eyvanından aşağı enmək istəyərkən alt mərtəbənin eyvanında ilişərək köməksiz vəziyyətdə qalıb. Məhəccərdən tutunaraq bir müddət asılı qalan şəxs öz gücü ilə xilas ola bilməyib və qonşularından kömək istəyib.

Hadisə ilə bağlı 112 Təcili Çağrı Mərkəzinə məlumat verildikdən sonra ünvana xilasetmə briqadası cəlb olunub. Əraziyə gələn xilasedicilər nərdivandan istifadə edərək məhəccərdə asılı qalan şəxsi təhlükəsiz şəkildə aşağı endiriblər.

Hadisə anı ətrafdakı şəxslər tərəfindən mobil telefonla lentə alınıb.

Əraziyə avtomobilini götürmək üçün gələn Kadir Kocabıçak bildirib ki, qonşular ona zəng edərək xilasedicilərin gələcəyini və avtomobilini həmin yerdən çəkməsini xahiş ediblər.

"Hadisə yerinə çatanda şəxsi eyvanın məhəccərində asılı vəziyyətdə gördüm. Xilsaedicilər gəlib onu xilas etdilər. Niyə oraya çıxdığını və necə həmin vəziyyətdə qaldığını bilmirəm", - deyə o qeyd edib.

Telegramda izləyin