Arıqlamaq istəyən gənc qadın diş fırçasını uddu

Türkiyənin İstanbul şəhərində 21 yaşlı qadın arıqlamaq məqsədilə özünü qusdurmağa çalışarkən ehtiyatsızlıqdan 13 santimetr uzunluğunda diş fırçasını udub.

Sonxeber.az xarici mediaya istinadla xəbər verir ki, hadisədən sonra vəziyyəti pisləşən qadın yaxınları tərəfindən Kanuni Sultan Süleyman Təlim və Araşdırma Xəstəxanasına çatdırılıb. İlkin tibbi yardımdan sonra o, endoskopiya şöbəsinə yönləndirilib.

Ümumi cərrahiyyə mütəxəssisi Kubilay Özgür Öztütüncünün rəhbərlik etdiyi həkim briqadası tərəfindən həyata keçirilən təxminən 40 dəqiqəlik əməliyyat zamanı kiçik kəsik üsulu ilə qadının mədəsindəki 13 santimetrlik diş fırçası uğurla çıxarılıb.

Həkimin sözlərinə görə, əvvəlcə belə uzun diş fırçasının necə udula bilməsinə inanmayıblar. Aparılan kompüter tomoqrafiyası zamanı məlum olub ki, qadın özünü qusdurmağa çalışarkən diş fırçası təsadüfən mədəsinə keçib.

Kubilay Özgür Öztütüncü bildirib ki, yad cismin yemək borusu və ya mədəni zədələməsi riskinə görə endoskopik müdaxilə məqsədəuyğun sayılmayıb və birbaşa cərrahi əməliyyat həyata keçirilib. Qadın əməliyyatdan iki gün sonra sağlam vəziyyətdə evə buraxılıb.

Həkim vətəndaşlara bu cür hallarda özbaşına müdaxilə etməmələri və dərhal tibb müəssisəsinə müraciət etmələrinin vacibliyini də xatırladıb.

Telegramda izləyin