Məşhur fenomen cütlük silahlı hücum nəticəsində yataqlarında öldürülüb

Kosta Rikanın La Kruz bölgəsində tanınmış sosial media fenomeni, 28 yaşlı Gabriela Sanarrusia Çavarria və 30 yaşlı sevgilisi Xorxe İsaak Agüero Korea yaşadıqları evdə silahlı hücumun qurbanı olublar.

Sonxeber.az xarici mediaya istinadla xəbər verir ki, gecə saatlarında kimliyi hələ müəyyənləşdirilməyən silahlı şəxslər zorla evə daxil olaraq birbaşa yataq otağına keçiblər. Həmin vaxt yuxuda olan cütlük atəşə tutulub. Hadisə yerinə gələn təcili tibbi yardım briqadası onların həyatını itirdiyini təsdiqləyib.

Hadisədən sonra qaçan şübhəlilərin axtarışına başlayan polis cinayət yerindən təxminən 2 kilometr aralıda boş ərazidə tamamilə yandırılmış avtomobil aşkar edib. İlkin araşdırmalara əsasən, hücum edən şəxslərin həmin nəqliyyat vasitəsindən qaçış üçün istifadə etdikləri, daha sonra isə izləri itirmək məqsədilə avtomobili yandırdıqları ehtimal olunur.

Kosta Rikanın Məhkəmə İstintaq Orqanı (OIJ) hadisənin törədilmə üsulu və peşəkar şəkildə planlaşdırıldığını nəzərə alaraq, bunun soyğunçuluq deyil, mütəşəkkil cinayətkar qruplar arasında mümkün hesablaşma ola biləcəyini istisna etmir.

İstintaq çərçivəsində müəyyən edilib ki, Gabriela Sanarrusia Çavarria daha əvvəl iki ayrı silahlı hücumdan yaralı xilas olub. Həmçinin onun keçmiş biznes tərəfdaşlarının narkotik vasitələrin qanunsuz dövriyyəsi ilə əlaqələrinin olduğu bildirilir.

Faktla bağlı genişmiqyaslı istintaq davam etdirilir. Hadisə sosial şəbəkələrdə də geniş rezonans doğurub.

Telegramda izləyin