Gürcüstanda təbii fəlakət: Telavini su basdı, körpü uçdu

Gürcüstanda yağan güclü yağışlar Telavi şəhərində genişmiqyaslı daşqına səbəb olub.

Oxu.Az Gürcüstan mətbuatına istinadən xəbər verir ki, suyun səviyyəsinin kəskin artması nəticəsində Telavisxevi çayı məcrasından çıxıb.

Çay şəhərin prospekt və küçələrini qismən su altında qoyub. Yaşayış binalarının birinci mərtəbələrini, mağazaları, aptekləri və kommersiya obyektlərini su basıb. Avtomobillərə, elektrik verilişi xətlərinə və qazpaylayıcı şəbəkəyə ciddi ziyan dəyib. Nəticədə minlərlə abonent elektrik enerjisi və təbii qazsız qalıb.

Ən ağır vəziyyət Kafkasioni küçəsində qeydə alınıb. Gecə saatlarında böyük miqdarda daş və palçıq gətirən sel axını iki küçəni birləşdirən körpünü tamamilə dağıdıb.

Təhlükəsizliyi təmin etmək məqsədilə hakimiyyət orqanları aqrar bazar ərazisindən və digər təhlükəli zonalardan sakinləri təxliyə edib. Şəhərin bir neçə mərkəzi küçəsində hərəkət məhdudlaşdırılıb, vəziyyətə patrul polisi nəzarət edir.

Telavidə təbii fəlakətin fəsadlarının aradan qaldırılması üçün operativ qərargah yaradılıb.

"Artıq indidən demək olar ki, vurulan ziyan böyükdür. Lakin çayda suyun səviyyəsi enməyənədək və zədələnmiş infrastruktura baxış başlamayanadək dəyən ziyanın dəqiq miqyasını müəyyən etmək mümkün deyil", - deyə Kaxetiya regionunun qubernatoru Platon Kalmaxelidze bildirib.

Telegramda izləyin