İrandan ABŞ-yə çağırış: "Ya memoranduma əməl edin, ya da bədəlini ödəyin"

İran parlamentinin spikeri Məhəmməd Baqir Qalibaf ABŞ-ni Tehranla imzalanan anlaşma memorandumunun müddəalarına əməl etməyə çağırıb.

Oxu.Az xəbər verir ki, Qalibaf bu barədə "X" sosial şəbəkəsindəki hesabında yazıb.

"Birtərəfli razılaşmalar dövrü başa çatıb. Biz demişdik: sözünün üstündə dur, əks təqdirdə bədəlini ödəyərsən. Reallıq qapını döyür", - deyə o bildirib.

Spiker paylaşımına memorandumun beşinci bəndinin surətini əlavə edərək bir müddəanı xüsusi qeyd edib. Həmin müddəaya əsasən, sənəd imzalandıqdan sonra İran 60 gün ərzində Fars və Oman körfəzləri arasındakı Hörmüz boğazında ticarət gəmilərinin təhlükəsiz və maneəsiz keçidini təmin etmək üçün bütün səylərini göstərməlidir.

Xatırladaq ki, daha əvvəl İran İslam İnqilabı Keşikçiləri Korpusu (SEPAH) ABŞ-nin regiona müdaxiləsi dayandırılana qədər Hörmüz boğazının bağlandığını elan etmişdi. SEPAH-ın məlumatına görə, buna səbəb icazəsiz marşrutla hərəkət edən gəmilərlə bağlı baş verən insident olub. Qurum insidentə görə məsuliyyəti Vaşinqtonun üzərinə qoyub.

Bundan sonra ABŞ Mərkəzi Komandanlığı (CENTCOM) gəmiyə edilən hücuma cavab olaraq İran ərazisinə zərbələr endirdiyini açıqlayıb. Ardınca İranın "Tasnim" və "Mehr" agentlikləri Küveyt və Qətərdə partlayışlar baş verdiyini, BƏƏ Müdafiə Nazirliyi İranın raket və dron hücumlarının dəf edildiyini, SEPAH isə İordaniyadakı ABŞ-yə məxsus "Şahzadə Həsən" aviabazasına raket zərbəsi endirildiyini xəbər verib.

Telegramda izləyin